PIA Press Release
Sunday, January 01, 2012 Cebuano News: Mag-uuma mitapos sa SOA mapasalamaton sa programaby Pat Nano OROQUIETA CITY, Misamis Occidental, January 1 -- Maayong programa alang sa mga mag-uumang taga-Jimenez ug sa mga kasikbit nga mga lungsod nga mitapos sa school on the air (SOA): Banag-Banag sa Mag-uma nga programa nga gipahigayon ubos sa pag-‘anchor’ sa ilang Municipal Agriculture Officer nga si Rodrigo Simbajon. Sumala pa ni Lourdes Hilot usa sa mga mi-‘gradwar’ sa nasangpit nga programa nga dakong tabang alang kanilang mag-uuma ang SOA sanglit daghan sila og mga nakat-unan nga ilang nagamit diha sa ilang pagpananom ug pagpanguma. Gidugang pa ni Hilot nga kadaghanan karon sa mga mi-‘enroll’ ug migradwar ang migamit na gayod sa mga pamaagi nga ilang nakat-unan gikan sa nasangpit nga programa, subay usab sa kung unsa man ang gitudlo sa ilang magtutudlo sa kahanginan. Gipasabot usab ni Hilot nga diha sa SOA gi-awhag sila sa pagpananom sa mga utanon, humay, mais, mga lagutmon ug mga ‘fruit trees’ aron mamahimong kapaninguhaan sa dugang kakitaan nga ikalambo sa ilang panginabuhi ug usab sa ikalambo sa ilang lungsod. (PIO/PIA-10) | 
