PIA Press Release
Sunday, January 01, 2012 Cebuano News; Katakos sa Comval emergency response team nasulayan sa bahaNABUNTURAN, Compostela Valley Province Jan. 01 (PIA) – Nasulayan sa nagsunod sunod nga mga pagbaha, ang katakos sa Emergency Response Team sa probinsiya nga bag-o pa lamang nakahuman sa Water Search and Rescue Training (WASAR) nga gi dumala sa Marine Research Training Center sa Brgy. Pindasan, Mabini. Ang bag-ong grupo sa Emergency Reponse Team sa kapitolyo gituyo pagmugna ni Gov. Arturo “Chiongkee” Uy-PDRRMC Chair, aron nga pinaagi kanila matubag dayon sa probinsiya ang dinalian kaayong panginahanglan sa mga katawhan nga mao ang paghimo’g hinanaling Rescue and Retrieval Operation sa higayon nga dunay mahitabong insidente sa kalamidad sama sa landslide ug mga pagbaha sa Comval. Kining grupoha giapilan sa mga pinili ug hinashasang mga empleyado sa kapitolyo nga gipailalom sa lain-laing klase sa mga pagbansay nga gilangkoban sa Medical First Responder Training (MFR) nga gidumala sa 911 sa kapitolyo, sa Water Search and Rescue Training (WASAR) nga gidumala sa Maritime Research Training Center sa Brgy. Pindasan Mabini, ug sa Mountain Search and Rescue Training diha sa Brgy.Sasa Nabunturan nga gidumala sad sa BFP Panabo uban ang Panabo Rescue Team. Matud ni PDRRMO Chief Raul Villocino nga human sa ilang WASAR Training, unang nasulayan ang katakos sa Comval Emergency Response Team niadtong Desyembre 16 sa diha nga kini mitabang sa LGU Compostela pag rescue sa mokabat 100 ka pamilyang nabahaan diha sa Phase-1, Phase-2, ug Phase-3 sa Purok 13 Centennial gamit ang tulo ka Rescue Boats sa Probinsiya. Niadtong adlawa naapil ang Comval sa mga probinsiya nga gideklara sa PAG-ASA nga Signal No.2 sa bagyong Sendong. Sa Desyembre 27, subling milihok na sad ang Comval Rescue Team gamit ang tulo ka mga Rescue Boats sa probinsiya aron pagluwas sa mokabat 33 ka pamilyang nabahaan diha gihapon sa poblacion Compostela ug sa mokabat 40 ka pamilyang nalunopan diha sa Montevista. Sa Montevista 20 ka pamilya ang ilang naluwas diha sa Brgy. Banag-banag, 10 ka pamilya diha sa Brgy. New Visayas, ug laing napulo ka pamilya diha sa Poblacion duol sa St. Bridget. (IDS-Comval/Gilbert Cabahug) | 
