PIA Press Release
Monday, January 02, 2012 Hiligaynon news: DSWD nagakinahanglan dugang nga empleyado para sa ekspansyon sang core-programsni Elsa S. Subong SYUDAD SANG ILOILO, Enero 2 (PIA) -- Dugang nga mga empleyado ang ginakinahanglan sang Department of Social Welfare and Development (DSWD) para maga-implementar sang ekspansyon sang ila programa sa pagbuhin sang kaimulon. Suno sa kay DSWD-6 Director Minda Brigoli nakahanda na sila nga pagapalaparon ang programa sang Kapit-Bisig Laban sa Kahirapan-Comprehensive and Integrated Delivery of Social Services ukon Kalahi-CIDSS; ang Pantawid Pamilyang Pilipino Program ukon 4Ps, kag ang Self-Employment Assistance (SEA-K) nga programa. Para sa sini ginsiling ni Brigoli nga nagakinahanglan sila sang mga 200 ka dugang nga tinao sa pagpatigayon sining mga programa sanglit may ara pa sila iban nga mga hilikuton nga duna sa ila ahensya. Ang mga tinao nga kinahanglan ginalakipan sang mga enhinyero, financial analysts, community workers kag iban pa nga support staff. Ginsiling ni Brigoli nga ang bag-o nga Kalahi-CIDSS nga kabanwahanan sakup sang 2011 tubtub 2012 may pundo nga mga P234.26 ka milyon, para sa 408 ka mga barangay kag 216 ka prioritized sub-projects. Ini nga mga banwa amu ang Maayon, Tapaz kag Jamindan sa probinsya sang Capiz; Barotac Viejo, Bingawan, Carles, Calinog kag Lemery sa Iloilo; Don Salvador Benedicto, Hinoba-an kag La Castellana, sa Negros Occidental; kag, Libacao kag Madalag sa Aklan. Sa pihak nga bahin, ginsiling ni Brigoli nga ila man paborabli nga ginakonsiderar ang paglakip sang syudad sang Iloilo kag sang Bacolod sa Urban Kalahi-CIDSS program bangud ini nga sila may ara man nga mga linibo ka mga pobre nga pumoluyo. Gindugang man ni Brigoli nga ang pagpalapad sini nga mga dalagku nga programa sang nasyonal nga pangulohan batuk sa kaimulon nagatuyo sa paghimu sini nga makalab-ut sa madamu pa. (JSC/ESS-PIA6 Iloilo) | 
