PIA Press Release
Monday, January 02, 2012

Cebuano news: DBM nagpagawas ug Php1-B alang sa DPWH

DIPOLOG CITY, JAN. 2(PIA) -- Isip pagtuman sa panglantaw ni Presidente Benigno Aquino III nga mapalambo ang kalidad sa kadalanan sa nasod, nagpagawas ang Department of Budget and Management ug 1 ka bilyon ka pesos ngadto sa Department of Public Works and Highways alang sa preventive maintenance sa 139.627 ka kilometrong nasudnong kadalanan sa nasod.

Si Budget Secretary Florencio “Butch” Abad nagkanayon nga ang gipagawas nga pondo nagagikan sa Special Support Fund sa Vehicle Users Charge.

“Ang 1-ka bilyon ka pesos gipagawas isip pagtuman sa saad ni Presidente Aquino nga ipalambo ug i-rehabilitate ang kadalanan sa nasod ug mapabilin ang kalidad niini ingon man malugwayan ang ilang kinabuhi. Ang DPWH mipasalig nga siento-por-siento nang aspaltado ang 15,872 ka kilometrong national arterial roads sa nasod pag-abot sa tuig 2014,” matod pa ni Abad.

Ang 1-ka bilyon ka pesos gamiton isip counterpart funding alang sa National Road Improvement and Management Project II.

Ang NRIMP II mao ang ikaduhang bahin sa tulo-ka-tuig nga programa sa pag-establisar ug sistema sa pagdumala nga ma-upgrade ug mapreserbar ang National Road System sa usa ka “environmentally, socially ug financially sustainable nga pamaagi.

Ang proyekto maoy tubag sa pagmintinar ug pag-improve sa national arterial roads ug mga tulay pinaagi sa long-term performance-based contracts ug pagpalapad sa national road maintenance program.

Sa 1-ka bilyon ka pesos nga pondo, walo ka rehiyon ang makabenepisyo sa preventive road maintenance ug rehabilitation projects.

Ang labing dakong pahat sa pondo nga 150 milyones ka pesos ihatag sa rehiyon IV-A aron gamiton pagpa-aspalto sa overlay sa Tagaytay-Nasugbu Road sa Batanagas.

Naglaum ang DPWH nga makab-ot ang ilang gitarget nga 94 porsientong pagpa-aspalto sa 15,872 ka kilometrong national arterial roads ug 74 porsiento sa 11,428 ka national secondary roads pagtapos sa tuig 2012.

Labaw sa tanan, ang 7,793 ka mga nasudnong tulay nga dunay kinatibuk-ang gitas-on nga 330,089 linear meters himoon nang permanente karong tuiga. Sa kinatibuk-ang gitas-on sa tulay, 104,293 linear meters niini ang ipailalom sa repair ug rehabilitasyon samtang 8,544 linear meters ang himoon na gyung permanente. (ALT/ATR/PIA9/Zambo Norte)