PIA Press Release
Monday, January 02, 2012 Waray News: Mga langyawanon gin-aaghat nga pumakadto ha Bureau of Immigration hin personal tinikangan Enero 3MANILA, Jan. 2 -- Gin-aaghat ngan ginpapahinumdum an ngatanan nga mga langyawanon nga pumakadto han opisina han Bureau of Immigration (BI) hin personal para han ira ikina-tuig nga pagpakita o pagreport tinikangan hiton Enero 3, kay kon dire hira pumakadto ha BI, hira en maatubang hin mga pinalidad kay dire man hira nahisusubay hiton mga langyawanon nga nagpaka-documento. Hi Commissioner Ricardo David Jr. en nagsering kakulop nga adlaw (Domingo) nga an ira ikina-tuig nga pagpakita o pag-report en nahisusubay hiton kamanduan ha ilarum han Alien Registration Act of 1950 nga kon diin hira en ginmamanduan nga pumakadto ha opisina han BI sakob hin 60 diyas ha kada tuig. Adton dire pumakita o pumakadto para han ira ikina-tuig nga pag-report en matatagan hin administratibo nga pinalidad o di ngani hira en maatubang hin deportation proceedings. Sanglit, gin-aaghat gud ni David an mga langyawanon nga magreport hin temprano para dire na magdagmit hiton deadline. Sumala pa kan BI Alien Registration Division chief Ronaldo Ledesma nga ha ilarum hiton Section 10 of the Act, an mga langyawanon nga may-ada immigrant o di ngani non-immigrant visas en kinahanglan gud magpakita han opisina han BI ha kada tuig. Nagsering pa hi Ledesma nga pwede hira pumakadto ha BI main office didto ha Intramuros, Manila o di ngani didto han ira mga field offices o di ngani han ira mga satellite offices ha bug-os nga nasud. Hi Ledesma en nagsasagda han mga langyawanon nga magderitso han bureau’s cashier office, magbayad hin P300 para han ira annual report fee ngan P10 para han legal research fee, ngan mag-aro hira hin opisyal nga resibo para dire hira mabiktima han mga fixers. Ha ilarum hiton aton balaud, an mga langyawanon nga mapakadto han opisina han BI para han ira ikina-tuig nga pagpakita o pag-report en kinahanglan magdara hira han ira ACR (alien certificate of registration), identity card (I-Card) ngan certificate of residence. (PIA-E. Samar, translated by S. Candido | 
