PIA Press Release
Tuesday, January 03, 2012 Cebuano News: Zero ang angol sa pabuto, usa ang samad nga binuthan sa So. Leyteni Bong Pedalino MAASIN CITY, Southern Leyte, Jan. 3 (PIA) -- Gawas lamang sa usa ka gunshot wound, ang talaan dinhing dapita angayan nga sundogon. Napabilin sa lalawigan ang record niini sa ikaduhang tuig karon nga walay nanga-unsa o nadala sa hospital gumikan kay nabuthan og pabuto sa pagsugat sa alingog-ngog nga kasaulogan sa bag-ong tuig. Hangtud alas 8 sa buntag pagka Enero 1, walay mga firecracker-related nga mga kaso ang natala sa Salvacion Oppus Yniguez Memorial Provincial Hospital (SOYMPH) ning dakbayan ingon man didto sa Sogod District Hospital (SDH). Nga walay na-biktima sa daw maka-bungog nga pabuto timailhan lamang nga ang gipahugtan nga kampanya sa Department of Health (DOH), ang “Aksyon Paputok Injury Reduction” (APIR) nagmalampuson, bisan pa man ang Philippine National Police (PNP) ug ang Bureau of Fire Protection (BFP) mihimo sab sa ilang tampo diha sa pagpalanog sa “Iwas Paputok” nga kampanya. Didto sa SDH, nasayran nga usa ka Rodel Renoblas, 21, single, molupyo sa barangay Tampoong, Sogod, ang gidali pagdala sa tambalanan tungang gabii sa bag-ong tuig human siya masamdi og gunshot sa iyang likod. (BP/PIA-Southern Leyte) |
