PIA Press Release
Tuesday, January 03, 2012 Cebuano news: Walay biktima sa paboto sa Tagbilaran atol sa Bag-ong TuigTAGBILARAN CITY, Bohol, Jan. 03 (PIA) -- Walay gikatahong naangol gumikan sa paboto o sa saag nga bala sa syudad sa Tagbilaran atol sa pagsugat sa Bag-ong tuig 2012.Kini ang gibutyag ni Tagbilaran City Police Station Chief, P/Supt. Gil del Prado sa usa ka radio interview. Matud pa ni Del Prado nga nakatabang ang ilang gihimo nga pagpatrolya inubanan sa pagdili sa pagbaligya sa mga paboto palibot sa syudad. Gipunting ni del Prado nga wala usab itugot sa kagamhanang lokal sa syudad sa Tagbilaran ang pagpamaligya sa tanang klase sa mga paboto kay wala man kini hatagi og business permit ni Mayor Dan Lim kay makamugna lamang kini og kadaut sa panglawas sa mga katawhan ug peligroso usab kini sa sunog sa syudad. Nakatabang usab ang gihatag sa City PNP nga dugang 50 ka mga polis gikan sa rehiyon aron sa paghatag og saktong seguridad sa mga malls, plaza, airport ug seaport sa dakbayan nunot sa kasaulogan sa kapaskuhan ug bag-ong tuig. (Elvira Bongosia/PIA-Bohol) | 
