PIA Press Release
Wednesday, January 04, 2012

Cebuano news: DFA unahon ang pagpalalin sa mga OFWs gikan sa gubot nga dapit sa Syria

PAGADIAN CITY , Jan 4 (PIA) – Ang Department of Foreign Affairs mipahayag nga unahon nila ang pagpalalin sa mga overseas Filipino workers (OFW) sa upat (4) ka gubot nga dapit sa Syria nga mao ang Homs, Hama, Idlib ug Daraa.

“Ang foreign minister sa Syria misaad nga tabangan kita pinaagi sa pagpadangat ug sulat sa mga mayor niining mga lugar diin adunay panagsangka ingon man sa pagpapauli o pagpalalin sa mga OFWs,” si DFA Undersecretary Esteban Conejos miingon sa usa ka interview.

Adunay 40 ka Pilipino didto sa Homs nga mipadangat sa ilang intensiyon nga mopauli dinhi sa nasod.

“Sila ang priority number 1. Amo karon nga gipamatud-an ang presensiya sa 40 ka OFWs didto sa Homs ug nagpadala na kami ug notisya sa foreign ministry nga nag-ila sa mga Pinoy didto ug nangayo sa tabang sa lokal nga mga opisyales alang sa ilang pagpalalin,” si Conejos mipahayag.

Ang ikaduhang priority mao kadtong narehistro sa embahada ug nagpadangat sa ilang tinguha ingon man nakigsabot na usab sila sa ilang mga employers.

Ang ikatulong hugna gilangkoban sa 200 ka OFWs diin ang embahada anaa na sa proseso sa kataposang pakigsabot ug negosasyon sa ilang mga employers.

Si DFA Secretary Alberto del Rosario kagahapon miingon nga gibana-banang adunay pila ka libo nga OFWs ang anaa sa upat ka gubot nga lugar didto sa Syria.

“Wala kita masayod ug unsa ang sitwasyon karon didto ug naningkamot kita nga makuha ang panabang sa Syrian foreign ministry aron mapamatud-an ang tanang impormasyon nga atong nadawat,” si Del Rosario namahayag.

“Sa pagkakaron, restricted o gidili ang pag-adto sa maong mga lugar. Ang mga diplomats dili tugotan nga makasulod didto,” matod ni Del Rosario.

Si Del Rosario miadto sa Syria aron pagsuta sa repatriation efforts sa kagamhanan ug pagpangayo ug tabang gikan sa ilang Syrian counterparts.

Kasagaran sa mga OFW didto mga household service workers ug 95% kanila undocumented o walay saktong papeles.

“Malisod ang pagsuta sa hustong talaan sa undocumented Filipinos sa maong dapit ug gibana-bana nga mogasto ang kagamhanan sa Pilipinas ug US$5,000 alang sa matag OFW nga ipalalin gikan sa Syria.

“Base kana sa upat ka component sa pagpalalin sa mga Pinoy gikan sa Syria – plane fare, exit visas, cost of penalties ug charges sa overstaying lakip niini ang deployment cost nga atong i-refund sa mga employers,” pahayag ni Conejos.

Si Conejos miingon nga walay problema kalabot sa pondo. “Nakig-estorya na kami sa mga airline companies alang sa reserbasyon alang sa ilang pagpauli sa atong nasod,” panapos nga pahayag niya. (ALT-PIA9/Zambo Sur)