PIA Press Release
Wednesday, January 04, 2012

Cebuano news: GPH military adviser alang sa sultihanay tali sa MILF gitudlo

PAGADIAN CITY, Jan. 4 (PIA) –- Usa ka kanhing brigade commander kinsa nakahatag ug dakong tampo sa pagpalungtad sa kalinaw sa Mindanao mao karon ang bag-ong gitudlo isip senior military adviser (SMA) sa Government of the Philippines (GPH) peace panel alang sa sultihanay uban sa Moro Islamic Liberation Front (MILF).

Si Brigadier General Leo Cresente Macaltao Ferrer, gitudlo sa Armadong Kusog sa Pilipinas isip SMA sugod niadtong Nobyembre 29, 2011. Iyang gihulipan ang puwesto ni BGen Restituto Aguilar kinsa miretiro niadtong bulan sa Agosto sa milabay’ng tuig.

Sa usa ka courtesy call nga gihimo ni Ferrer kagahapon, (Martes), si Presidential Adviser on the Peace Process Teresita Quintos-Deles mipadayag sa iyang pagsalig nga ang bag-ong SMA kinsa adunay halapad nga paglambigit sa proseso sa kalinaw ug isip pioneer member ug pangulo sa secretariat sa GPH Ad Hoc Joint Action group (AHJAG) sa dihang gitukod kini niadtong 2004. Ang AHJAG usa ka hinugpong tinguha sa kagamhanan ug MILF aron sa pagdumili ug paghiklin sa mga elemento nga nagsupak sa balaod kinsa midangup o nagtago duol sa mga komunidad sa MILF.

“Nalipay ako nga usa ka tawo sama ni BGen Ferrer, kinsa nagdala uban kaniya ug daghang mga panan-aw ug kasinatian, motrabaho sa hingpit uban sa atong negotiating panel,” mikutlo si Deles.

Natawo sa Pangasinan, si Ferrer migraduwar sa Philippine Military Academy (PMA) sa tuig 1981.

Sa wala pa siya gitudlo sa bag-ong puwesto, siya mao ang commander sa Task Force General Santos ug kasamtangang 601st Brigade Commander, Philippine Army sa Tacurong, Sultan Kudarat, lakip ang mga dapit sa Maguindanao panahon sa nahitabong Maguindanao Masaker diin mitabang siya sa pagbawi sa tinagoang armas sa mga Ampatuan ug sa pagsikup sa mga suspetsado nga nalambigit sa masaker.

Matod pa sa GPH Coordinating Committee on the Cessation of Hostilities, si Ferrer sa kanunay nagtuman sa ceasefire agreement.

Sa dihang ang iyang brigade gibalhin ngadto sa Lanao del Norte diin si Kumander Bravo Macapaar sa MILF Bangsamoro Islamic Armed Forces maoy naglihok sa maong dapit, si Ferrer nakahimo ug kasabutan uban sa maong armadong grupo kinsa naglambigit sa kidnapping, piracy ug extortion samtang iyang giseguro nga walay paglapas nga mahimo batok sa kasabutan sa ceasefire. (OPAPP/ALT/PIA9/CAL)