PIA Press Release
Wednesday, January 04, 2012

Cebuano News: Kagamhanang Aquino miaprubar sa Anti-corruption Plan

MANILA, Jan 4 (PIA) –- Ang administrasyong Aquino miaprubar niadtong Martes sa Good Governance and Anti-corruption (GGAC) Plan alang sa tuig 2012-2016 nga gitumong sa paghimong simple ug sa pag-usa sa kasayuran sa gobyerno aron sa pagbatok sa pagpangawkaw ug korapsyon.

Ang panagtigom niadtong Martes sa Malacanang mao ang ika-duha nga panagtigom sa Cabinet Cluster on Good Governance and Anti-corruption nga gipanguluhan ni Presidente Benigno S. Aquino III.

Si Budget Secretary Butch Abad mipresentar sa GAC cluster plan ngadto sa Gabinete niadtong Martes ug katapos sa duha ka oras nga deliberasyon ang maong plano giparubahan nga walay pagsupak.

Matud pa sa tigpamaba sa Presidente nga si Edwin Lacierda, ang naglangkob sa cluster plan magtubag sa mga problema sa pagpangawkaw ug korapsyon diha sa tukma sa panahon nga pag-analisar ug sa pagtaho sa talaan sa gobyerno.

Kini usab gitumong sa pagpabaskog sa usa ka makanunayong katilingban isip kaabag niini nga mga paningkamot alang sa mas maayo ug detalyado nga mga pamahayag, matud pa ni Lacierda sa usa ka press briefing sa Malacanang niadtong Martes.

Sa mao usab nga press briefing, si Abad nagkanayon nga ang panuyo sa good governance and anti-corruption cluster mao ang pagbatok sa korapsyon ug sa pagseguro nga ang mga pampublikong serbisyo ang gihatag ngadto sa katawhan. Ang gobyerno usab nagpaabot nga ang negosyo ug ekonomikanhong kahimtangan molambo katapos kini nga lakang mapahamtang.

Ang administrasyon nagduso sa tulo ka mga inisyatibo pinaagi sa plano: pagkaklaro,pagkaresponsable ug pagpakighilambigit sa molupyo, pahayag pa ni Abad.

Ang pagduso sa pagkaklaro, pagkaresponsable ug pagpakighilambigit sa molupyo nagkinahanglan kanato sa pagtan-aw ngadto sa gikinahanglan nga balaud ug palisiya nga nagkinahanglan nga tun-an ug lig-unon.Ug sa pagpalambo sa digitization ug mga kabag-uhan sa mga operasyon sa gobyerno. Ug sa katapusan, paghimo ug agresibo nga kampanya sa pagpakatap ug komunikasyon, matud pa niya.

Aron sa pagseguro sa pagkaklaro sa mga transaksyon sa gobyerno, ang anti-corruption plan nagtawag alang sa gimandar nga pagbutyag nga impormasyon sa budget sa mga ahensya ug mga lokal nga mga pangagamhanan, matud pa ni Abad.

Ang gobyerno usab nagpahalapad sa mga operasyon sa Philippine Government Electronic Procurement System aron sa pagpalambo sa pagkaklaro, matud pa niya.

Sa susamang higayon, si Abad nagkanayon nga isip silot nga aksyon, ang gobyerno magtrabaho alang sa mas paspas nga pagsulbad sa mga nagkalain-laing mga kaso ilabi na kadtong pagpangawkaw ug korapsyon. Kini usab nagtumong sa pagpalambo sa tinuig nga gidaghanon sa kaso nga masulbad sa Department of Justice (DOJ) gikan sa pagkakaron nga lebel ngadto sa 85 porsyento.

Ang nakab-ot sa Revenue Integrity Protection Service (RIPS) ang pagadugangan, matud pa ni Abad nga nagdugang nga ang gobyerno usab nagpalig-on sa nag-inusarang ganghaan alang sa impormasyon sa gobyerno. (Translated by RSVictoria/PIA 8/BILIRAN)