PIA Press Release
Wednesday, January 04, 2012 Aklanon News: Aklan ag AusAID nagpirma it MOA sa pagkaayad it mga karsadani Venus G. Villanueva KALIBO, Aklan, Enero 4 (PIA6) -- Ro probinsya it Aklan, paagi kay Governor Carlito S. Marquez, ag ro Australian Aid for International Development (AusAID) hay nagpirma kurundaya eamang sa sangka Memorandum of Agreement (MOA) para sa Provincial Road Network Management Facilities program. Ro programa nga, suno kay Engineer Roger Esto, Provincial Planning and Development Coordinator nga sambilog sa nakasaksi sa pagpirma it MOA, hay nahanungod sa pagkaayad ag pag improbar it mga karsada it probinsya sa sari-saring mga banwa sa aklan. Ginsugid ni Esto nga sa rayang programa, ro AusAID hay magatao sa Aklan it P40 milyones kada dag-on sa sueod it tatlong dag-on agud ma implementar ro proyekto, samtang ro probinsya hay magatao it 12% nga tuwang sa pundo. Gindugang ni Esto nga ro bulig sa Aklan it AusAID hay mayad nga butang, bangud owa it pundo ro probinsya sa pagkaayad it mga karsada. Unahon sa pagkaayad, suno kay Esto, ro mga karsada sa maeayo nga lugar agud kon mayad eon ro aeagyan, mangin maeumo ro pagdaea sa mga baealigyaan it produkto it mga mangunguma. Ginapanan-aw man nga ro bulig halin sa Australia hay makatao it abu nga trabaho sa mga Aklanon, bangud ro mga trabahante sa pagkaayad it karsada hay idto man mismo bue-on sa mga lugar nga may ginakaayad. Dugang pa gid, magabaton man ro probinsya it bonus nga P40 milyon kon mayad-ayad ro pag implementar it proyekto, suno sa PPDO. Kon mangin angay ro Aklan sa bonus, ro kwarta hay pagagamiton man gihapon sa pagkaayad it mga karsada, hambae ni Esto. (JSC/VGV-PIA 6 Aklan) | 
