PIA Press Release
Thursday, January 05, 2012

Cebuano news: Donasyon alang sa mga biktima ni Sendong, miabot ug $19.27 milyones

DIPOLOG CITY, JAN. 5(PIA) -- Ang Department of Foreign Affairs mitaho nga hangtud niadtong Enero 3, nakadawat sila ug pahibalo nga miabot na sa $19.27 milyones ang nadawat nga donasyon ug mga pledges para sa mga biktima sa bagyong Sendong nga mihapak sa nasod ug nagbilin ug dakong kadaot sa Northern Mindanao.

Ang maong kantidad nagagikan sa Pilipinhong komunidad, Embahada ug Konsulada sa Pilipinas sa nagkalain-laing bahin sa kalibutan, mga pribadong indibidwal ug nagkalain-laing organisasyon. Dili pa lakip niini ang mga donasyon ug pledges nga walay katumbas nga balor sa salapi ug kadtong gihatag sa United Nations flash appeal.

Kini gilangkuban sa US$8,324,285.22 nga cash; US$5,354,063.95 nga nagakalain- laing butang; ug US$5,594 nga mga pledges.

Ang mga bag-ong donor gilangkuban sa European Union (US$3,876,958.81 nga mga butang); Laos (US$15,000, cash); Hongkong (US$257,000 cash);

Taiwan (US$12,993 cash); Germany (US$651,193.36, cash) ug Luxembourg (US$46,744.61, cash).

Mihatag usab ang Japan ug dugang hinabang nga US$2 milyones, samtang gituman usab sa Belgium ang una niining gisaad nga US$130,568 .58 nga cash ug midugang pa gyud ug laing US$391,461.09 nga cash aron itabang sa mga biktima sa bagyong Sendong.

Ang uban pang kahugpungan sa mga Pilipino nga mihatag ug hinabang sa mga biktima sa bagyong si Sendong, naglakip sa Pilipinong komunidad sa Hawaii (US$30 mil nga cash ug US$14 mil nga pledges); Embahada sa Pilipinas sa Tel Aviv ug Pilipinong komunidad sa Israel (US$807); Embahada sa Pilipinas sa Wellington ug Pilipinong komunidad sa New Zealand(US$1,000); Embahada sa Pilipinas sa Washington D.C. ug Pilipinong komunidad sa Ottawa(US$1,000), ingon man dugang US$4,800 gikan sa Pilipinong komunidad sa United States Northeast.(ALT/ATR/PIA9-Zambo Norte)