PIA Press Release
Thursday, January 05, 2012 Hiligaynon News: Pawikan ginbuy-an kag ginbalik sa dagatni Carolina A. Dionela SYUDAD SANG SILAY, Neg.Occ., Enero 5 (PIA6) -- Pagkatapos nga magtinir ini sa sulod sang isa ka fishpen sang tion sang Paskua sa Brgy. Balaring, Syudad sang Silay, ang 45 ka kilo nga pawikan ang ginbuy-an kag ginbalik sa iya matuod-tuod nga puloy-an sa dagat. Si Silay Mayor Jose Montelibano ang nagpanguna sa pagpabalik sang pawikan, kaupod si Konsehal Ireneo Celis kag ang mga katapu sang Silay Bantay Dagat. Ang pawikan nasiud sa fishpen sang mangingisda nga si Rolando Junio, ini nadakpan sang Disyembre 26, kag ginhatag sa kustodiya sang Bantay Dagat. Ang nasambit nga pawikan ginbuy-an sa 12 ka kilometros nga kalayuon gikan sa baybayon. Ang berde kag olibo nga pawikan ang pinakaulihi nga gindugang sa malawig nga lista sang mga pawikan nga nakita sa syudad sang Silay kag ginpabalik liwat sa lawod. Suno kay Mayor Montelibano, ang mga mangingisda sa Brgy. Balaring nga makakuha sang pawikan nakahibalo na nga ang ini ara na sa peligro nga kahimtangan, kag ini ang igabalik sa kadagatan pagkatapus madokumentohan sang gobyerno lokal kag gina etiketahan sang Department of Envrionment and Natural Resources (DENR).*(JSC/CAD-PIA6 Neg.Occ.) | 
