PIA Press Release
Friday, January 06, 2012

Cebuano News: Palasyo gipanalipdan ang mga nahimong kaayohan sa ekonomiya batok sa mga kritisismo

SURIGAO CITY, Enero 6 (PIA) -- Ang Malacañang nagdahom nga mopakita og mahinungdanong kauswagan ang sektor sa agrikultura tungod sa dugang badyet nga gigahin ngadto sa Department of Agriculture karong tuiga, nga gilaumang makapasaka sa ekonomiya sa nasod.

Atol sa press conference kagahapon Huwebes, si Presidential Spokesman Edwin Lacierda gibabagan ang mga kritisismo nga nag-ingon nga ang nasod dili makatagamtam og dugang pag-uswag sa ekonomiya karong tuiga tungod sa huyang nga mga polisiya sa gobyerno.

Si Lacierda miingon ang nasod nakapakita og pag-usbaw sa produksyon sa agrikultura bisan pa sa mga bagyo ug mga kalamidad nga miigo sa Pilipinas miaging tuig.

“Agricultural productivity is growth, is real and equitable growth. So many people would be benefited from increased agricultural productivity,” siya miingon isip tubag sa mga komento nga nagpatuo nga ang gobyerno wala makahimo og dugang nga mga katrabahoan.

“This is growth for the farmers; agricultural productivity will benefit a great number of our people,” siya mipasabot.

Uban ang dako-dako nga badyet karong tuiga, ang DA miingon kini makatabang gyud pagpadayon sa mga inisyatibo nga mohatag og kasegurohan nga igo ang nag-unang kan-onon sa 2013 lakip na ang bugas, puti nga mais, balanghoy ug uban pang mga nag-unang kan-onon.

Sa iyang 2011 nga year-end report, si Agriculture Secretary Proceso J. Alcala miingon nga dakong parte sa 2012 nga badyet sa DA P61.73 bilyon ang gamiton aron ma-implementar ang Food Staples Sufficiency Program (FSSP), nga maoy sentro sa programa sa administrasyong Aquino.

Ang maong programa gitinguha ang pagpamuhunan sa mga nag-unang pasilidad, partikularmente sa imprastraktura sama sa irigasyon, farm-to-market roads, ug post harvest nga mga pasilidad, si Alcala miingon.

Uban ang alokasyon nga P24.5 bilyon sa tuig 2012 alang sa irigasyon, si Secretary Alcala miingon ang DA motukod og bag-ong mga sistema sa irigasyon, ug ibalik ug ayuhon kadtong naa na nga nagserbisyo sa mokabat 224,850 ektaryas nga yutang pananom libot sa nasod.

Alang sa postharvest ug uban pang mga imprastruktura, ang DA naggahin og P11.28 bilyon. Kini gamiton aron pagtukod sa drying, storage, ug prcessing nga mga pasilidad, storage ug milling equipment, lakip ang dairy equipment ug mga makinarya.

Ang DA miingon motukod usab sila og dagkong mga agri-fishery trading centers sa daghang mga erya libot sa nasod. (PIA-Surigao del Norte)