PIA Press Release
Friday, January 06, 2012 Kinaray-a News: Pagpulong kang mga benepisyaryo kang Pantawid Pamilya ginahiwatni Pilar S. Mabaquiao SAN JOSE, Antique, Enero 6 (PIA) -- Ang dugang nga apat kang mga banwa sa probinsya kang Antique nagahiwat kang pulong-pulong kang mga benepisyaryo nga makabaton kang suporta halin sa gobyerno sa idalum kang Pantawid Pamilyang Pilipino Program. Si Provincial Social Welfare and Development Officer Lazaro Petinglay naghambal nga anda gin-usisa ka mayad ang mga nalista nga benepisyaryo para mapasiguro nga sanda nagakadapat gid magbaton kang serbisyo kang gobyerno. Ang apat ka mga banwa amo ang Pandan, Sibalom, Tobias Fornier kag Hamtic nga may kabilogan nga benepisyaryo nga 9,706 ka pamilya. Tungod nga ang dya nga programa indi “dole out” ukon simple nga pagpanagtag kang kuarta lamang, ginahinyu gid kang DSWD ang suporta kang mga opisyales sa barangay sa pageksplikar sa mga katawhan nga anda dapat sabtan ka husto ang mga pamangkot sa paghinun-anun. Ginapanawagan man ni Petinglay ang mga benepisyaryo sa pagtuman kang kondisyon kang programa agud tayuyon nga mabaton ang suporta kang gobyerno ilabi na gid para sa edukasyon kag ika-ayong lawas kang andang kabataan. Sa 18 ka mga banwa sa probinsya 16 na ang ginabuligan kang Pantawid Pamilya nga programa. (JSC/PSM-PIA6 Antique) | 
