PIA Press Release
Saturday, January 07, 2012 Hiligaynon news: Army, opisyal sa disaster alisto kontra sa posible nga pagbaha sa Maguindanao kag North CotabatoKORONADAL CITY, Enero 7 (PIA) -– Maid-id nga ginabantayan sang mga opisyal sa peligro kag militar ang lebel sang suba kag mga pirmi ginaagihan nga mga banwa sa Maguindanao kag North Cotabato tungod sa padayon nga ulan sang mga nagliligad nga adlaw sa bagatnan Mindanao. Mahibaluan nga ang probinsiya sang Maguindanao kag North Cotabato amo ang tilipunan sang tanan tubig suba sang mga probinsiya sang Bukidnon, Agusan, Davao del Sur, South Cotabato kag Sultan Kudarat pakadto sa Baybay sang Moro. Suno kay Brig. Gen. Manuel Ochotorena, assistant division commander sang Army 6th Infantry Division, Major Gen. Rey Ardo, puno sang 6th ID, nagmando sa tanan nga sanga sang militar sa Maguindanao kag North Cotabato nga gilayon magpahibalo sa Regional Disaster Risk Reduction Management Council ang ano mga sahi sang pagsaka sang kataason sang tubig sa Pawas Liguawasan kag iban pa nga mga suba sa rehiyon. Siling pa ni Gen. Ochotorena nga ang tanan nga hugpong sang Army sa duog ginmanduan nga magbantay kag gilayon nga magpahibalo sa nakita sa 6th ID kag kay retired General Loreto Lirao, chair sang RDRRMC sa Autonomous Region in Muslim Mindanao. Ginmanduan man ni Ochotorena ang 7 IB kag 5th Special Battalion sa banwa sang Pikit, Pagalungan kag Montawal nga gilayon nga ipasaylohon sa mataas nga duog ang pumuloyo sa duog malapit sa Liguasan Delta kag mga suba nga naga-ula sa Rio Grande de Mindanao. Dugang pa ni Gen. Ardo nga ang tanan nga hugpong sang Army ara sa estado nga alerto para magserbe nga manogsagop kon kinahanglan dugang sa ila obligasyon sa seguridad. “Amo ini ang amon katungdanan, amo ini ang pag-alagad sa pungsod,” hambal ni Ardo. (EBdelaCruz/PIA12) |
