PIA Press Release
Saturday, January 07, 2012 Hiligaynon news: PRO-6 nagasalig sa masobra 28 mil ka BPAT nga miembro para sa kalinong kag katawhayni Elsa S. Subong SYUDAD SANG ILOILO, Enero 7 (PIA) -– Ang Police Regional Office-6 nagasalig sa pwersa sang masobra 28 mil ka mga katapu sang Barangay Peacekeeping Action Teams (BPATs) sa Kabisay-an Nakatundan sa pagpalapnag sang kalinog kag katawhay. Sa iya mensahe sa Bag-ung Tuig, ginsiling ni PRO-6 Director Cipriano Querol, Jr. nga sia nagapaabut sang bug-os nga paghulag sang mga katapu sang BPAT sa mga 4,051 ka barangay sa rehiyon. Iya ginsiling nga mga 66.82 ka porsyento sining mga barangay ang nakatukod na sang ila BPAT. Sa sini nga kadamuon ginsiling ni Querol nga kumbinsido sia nga may mabakud na nga pag-angtanay ang nahimo sa mga longgos nga maluyagon sa kalinong kag katawhay, nga boluntad nga naghatag sang ila panahun, ikasarang kag kagamitan agud himuon ang ila mga komunidad nga hilway nga puy-an kag tukoran sang negosyo. Ang BPAT proyekto nga ginsuguran ni Querol pinasahi nga sahi sang pagbantay sa komunidad, kag nagahatag diri sang kusog agud manginresponsabli sa tanan nila nga mga hilkuton padulong sa kalinung, katawhay kag kauswagan. Ginsiling niya nga ang PRO-6 manginmadinalag-on diri upod sa suporta sang pinuno-lokal. “Magaduso kita sang mas mabakud nga pag-angtanay sa tunga sang pulisya kag komunidad sa sining tuig 2012, kag magpangabay sang suporta sang mga local nga lideres agud matigayon ang bug-os nga implementason sini,” ang siling ni Querol. (JSC/ESS-PIA6 Iloilo) | 
