PIA Press Release
Sunday, January 08, 2012 Cebuano News: Gov. Ramiro mapasalamaton sa opisyales ug kawani sa Mis. Occ.by Pat Nano OROQUIETA CITY, Misamis Occidental, January 8 -- Malipayon ug mapasalamaton si Governor Hermie Ramiro sa iyang nakita nga kadasig sa mga empleyado sa kapitolyo sa pagsulod sa trabaho ning unang adlaw sa trabaho sa tuig 2012, sukwahi sa iyang pagtoo nga gamay lamang ang motungha ngadto sa ilang mga buhatan. Sanag ug dasig ang panagway sa gobernadora mga mitimbaya ug mipadangat usab sa iyang pasalamat ngadto sa mga kaubanang opisyales sa probinsya partikularmente sa Sangguniang Panlalawiagan Office sa pagpangulo ni Vice-Governor Henry Oaminal nga maoy mi-sponsor sa pinakaunang flag raising ceremony sa tuig 2012 ug sa mga empleyado sa kapitolyo sa madasigong mitambong ug misulod sa ilang tagsa-tagsa ka buhatan sa kapitolyo. Unang gipasalamatan ni Governor Ramiro si Vice-Governor Oaminal sa mainiton usab niining pagtimbaya sa mga empleyado sa kapitolyo nga mitambong sa pinakaunang flag raising ceremony niining tuig 2012. Sumala pa sa gobernadora nga ang milabay nga tuig 2011 usa ka mabungahon nga tuig alang sa probinsya sa Misamis Occidental gumikan sa daghang mga programa ug proyekto sa probinsya ubos sa iyang administrasyon ang nagmalapuson ug nagmalaboon og kini gumikan usab sa mainitong suporta ug kooperasyon sa mga kaubanang opisyales, mga head of offices ug mga empleyado sa kapitolyo. Gidugang pa sa gobernadora nga mas labaw niyang gipasalamatan ang Labawng Makagagahom sa pagbulig niini sa kalampusan ug kalamboan sa mga programa ug proyekto alang sa katawhang Misamisnon, ilabina gayod ang paglikay niini sa mga kalamidad nga mahitabo dinhi sa probinsya. (PIO/PIA-10) | 
