PIA Press Release
Monday, January 09, 2012 Cebuano news: DENR nagsugod na sa nasudnong programa sa pagpananom sa mga kahoyby Pat Nano OROQUEITA CITY, Misamis Occidental, January 9 (PIA) -- Gilauman nga makahatag og maayong kaayohan sa kinaiyahan sa lalawigan sa Misamis Occidental labina sa Bukid Malindang ang programa nga gipatuman karon sa kagamhanang nasyonal nga gitawag ‘National Greening Program (NGP).” Kini human gipangunahan sa Department of Environment and Natural Resources kon DENR ang programa niadtong 2010 ug 2011. Matud pa ni City Environment and Natural Resources Officer (CENRO) Edgardo Aguinaldo sa Oroquieta City nga ang National Greening Program, susama kini sa miaging gipatuman nga Upland Development Program kon diin pangunahan sa DENR ang paghatag og mga ‘tree seedlings’ kun similya ngadto sa mialayon usab nga mga ahensya sa kagamhanan sama Department of Education, civic organization, people’s organization, local government units (LGU) ug uban pang grupo o pribadong mga katawhan nga buot motabang sa pag-atiman ug pagpanalipod sa kinaiyahan nga walay suhol. Gipasabot sa CENRO nga bisan naglisod sila sa pagpatuman sa NGP, nakompleto nila ang 292 ka ektarya nga natamnan didto sa unang distrito ug niining tuiga, posible nga motutok na usab ang DENR sa ikaduhang distrito. Gumikan niini, ang lalawigan sa Misamis Occidental, usa na sa mga probinsya nga sakop sa Amihanang Mindanao nga aktibong mituman sa NGP sa kagamhanang nasyonal. Nasayran nga sa dili pa mahuman ang termino ni Presidente Benigno Simeon Aquino III, makompleto ang 1.5 million hectares nga pagatamnan sa 1.5 billion ka mga seedlings sa tibuok nasud lakip na ang mga kabaybayonan. (CIO/PIA-10) | 
