PIA Press Release
Tuesday, January 10, 2012 Cebuano News: “Revenue collection” sa probinsya sa Cotabato miusbaw sa tuig 2011GENERAL SANTOS CITY, Jan. 10 (PIA) -- Usa ka maayong balita ang timbaya sa bag-ong tuig ngadto kang Gobernador Emmylou “Lala” J. Taliño-Mendoza tungod sa miusbaw nga koleksyon sa buhis nga naangkon sa lokal nga panggamhanan sa probinsya sa Cotabato sa tuig 2011. Base sa taho gikan sa tresurero sa probinsya nga si Manolito S. Filipinas, ang kinadak-ang kita sa probinsya migikan sa buhis sa balas ug graba nga misobra ug tres syentos porsyento. Matud pa miusbaw sab ang nakolektang buhis sa negosyo ug serbisyo tungod nga miabot sa 113% ang “collection rate” gikan sa mga laboratoryong medikal ug dental. Tungod niining maayong balita gipasidunggan sa gobernador ang Provincial Treasurer’s Office (PTO) ug misaad kini nga mohatag ug insentibo ngadto sa mga mamumuo sa buhatan nga nagkugi aron makab-ot ang dakong koleksyon sa buhis. Kahinumduman nga katong bulan sa Agosto 2011, una ng nakadawat ang PTO ug plake gikan sa Bureau of Internal Revenue (BIR) 12 kung asa giila ang probinsya sa Cotabato isip “Withholding tax top tax payer” sa sektor sa gobyerno. (PGFruylan/PIA-Gensan) | 
