PIA Press Release
Tuesday, January 10, 2012 Hiligaynon News: SWAT sa Roxas City ginselebrar una nga anibersaryoni Alex A. Lumaque SYUDAD SANG ROXAS, Capiz, Enero 10 (PIA 6) -- Ginsaulog sang mga katapu sang Special Weapons and Tactics (SWAT) team sang Roxas City Police Station (RCPS) ang una nga anibersaryo sang pagkatukod sini sang Enero 9 diri sa syudad sang Roxas. Kalakip sa mga aktibidades nga ginpatigayon sa nahauna nga anibersaryo sang SWAT amo ang firing competition sang mga katapu sang SWAT nga gintunga sa apat ka grupo, “boodle fight” nga panyaga kag pagplano kon paano pa gid labi nga mapabaskug ang grupo karon nga tuig 2012. Ginpahayag ni Supt. Kashmir Disomangcop nga amo ang hepe sang RCPS nga may direktiba si Mayor Angel Alan Celino nga ipaidalum ang pila ka mga katapu sang SWAT sa bomb disposal karon nga tuig. Ang plano nga paghanas sa pila ka mga kapulisan sa bomb disposal ang resulta sang pagkakita kag pagka-detonate sang isa ka improvised explosive device (IED) sang Disyembre sa Barangay Lawaan diri sa Roxas City. Gindugang pa ni Disomangcop nga ginaplano man sang RCPS nga magtukod sang “motorized crime operatives” agud nga magbulig sa police visibility sa syudad kag preparasyon sa mga kriminal nga naga-angkasanay sa motorsiklo kon magpang-atake sa biktimahon. Nahibaluan nga ang SWAT nga ginakabig pinaka-hanas kag armado nga grupo sang kapulisan sa rehiyon ang gintukod ni Celino sang Enero 9, 2011 kag ginsundan sang 45 ka adlaw nga SWAT Basic Training Course. (JSC/AAL-PIA 6 Capiz) | 
