PIA Press Release
Wednesday, January 11, 2012 Hiligaynon news: Paghinambalanay sa palupok ginaplano sang DOHMANILA, Enero 11 (PIA6) -- Ang Department of Health nagsiling nga sila nagaplano sa paghiwat sang isa ka paghinambalanay sa madasun nga bulan nahanungod sa mga palupok agud ang mga tikang sa pagpahagan-hagan sini magbutang sa lugar.Nagsiling si Secretary Enrique Ona sang DOH nga ang lapnagon nga paggamit sang mga mabaskug nga mga palupok sa nagliligad maka-alarma na bangud ini wala lang makatuga sang mga kapilasan apang kamatayon man. Sa pag-abi-abi sang 2012 nga bagong tuig, ang DOH nagsiling nga base sa ila nga mga record may talo ka mga tawo ang napatay. Si Ona nagsiling nga imbitaron nila ang mga ahensya sang gobyerno, mga pribado nga organisasyon kag mga manughimo sang mga palupok sa natalana nga paghinambalanay agud maseguro nga tanan nga aspeto matalakay. Wala sapayan nga ang paghimo sang palupok isa ka daku nga industriya, si Ona nagsiling nga ini dapat binagbinagon sa mga nagakalamatay kag mga napilasan bangud sa mga palupok. Ang DOH, suno kay Ona magaduso sang bug-os nga pagdumili sa paggamit sang mga indibidwal ukon mga panimalay sa paggamit sang mga palupok sa pagsug-alaw sang bagong tuig. Apang sa pihak nga bahin, ang DOH nagaduso nga maghiwat sang mga community freworks displays sang mga barangay ukon sang mga gobyerno lokal. Si Ona nagsiling nga ang publiko dapat mangita sang mga alternatibo nga paagi kung paano magaselebrar sang paskua nga wala sang sablag sa kalawasan kag kabuhi. (JCM/PIA6) | 
