PIA Press Release
Wednesday, January 11, 2012

Ilokano News: Abusado a pulis iti Ilocos Sur, ipulongyo–Chavit

VIGAN CITY, Jan. 11 (PIA) -- Binallaagan ni Gov. Luis “Chavit” Singson dagiti abusado a pulis a mangdaddadael ti imahen ti PNP ken mangmanmansa iti unipormeda ta kabuteng pay idan dagiti umili ta maikkat iti serbisyo.

Daytoy ti ballag ni Gov. Singson bayat iti press conference iti Baluarte iti Heritage City itay lawasna kalpasan iti pannakitaripnongna kadagiti hepe ti polisia kadagiti 34 nga ili pakairamanan ti siudad ti Vigan ken Candon kas chairman iti Provincial Peace and Order Council.

“Imbes a dakayo a polis ti mangsaluad kadagiti umili, dakayo metten ti mangabuso kadakuada, isu a nasken a maikkat iti serbisio dagiti abusado a polis,” kinuna ti gobernador.

Nakaawat ni Gov. Chavit iti adu a reklamo kontra kadagiti kabarbaro a polis a naidestino iti Ilocos Sur nga adda dagiti kumarkarit ken adda pay dagiti umas-asut ti paltogda nga ipatpaturong kadagiti umili. “Nasken nga ireportyo iti opisinak no asino dagitoy nga abusado a pulis tapno mayetnag kadakuada iti umisu a pannusa,” innayon ti gobernador.

Nadakamat no Gov. Chavit a dati a Chief of Police iti Vigan a nasken a napudno koma ken naimpusuan ti panagserbi dagiti polis kadagiti umili a saanyo ida nga abusuen wenno butbutngen. “Ipakita kadakuada a dakayo ti pudpudno a salaknibda, a nalag-an ti riknada kadakayo ta dakayo ti mangaywan iti linak ken urnos,” kinuna ti gobernador.

Imbilin pay ti gobernador iti naiget a kampania kontra iti illegal fishing nga agraraira ita kadagiti kabaybayan iti probinsia aglalo iti ili ti Sinait gapu ta addansa met dagiti padrino a polis.

Nasken a matiliw saan laeng a dagiti mangipatpatungpal iti ilegal a panagkalap uray pay dagiti aglaklako kadagiti dinamita a maar-aramat a pagbongbong, innayon ni Gob. Chavit, numan kiniddawna ti tulong iti nabuangay a Bantay Dagat kadagiti coastal towns iti probinsia..

Naalarma pay ti gobernador iti naireport nga adda dagiti van a nakaiserrek kadagiti “botcha” wenno “double dead” a karne ti baboy iti probinsxia a maipagarup a naggapu iti Pampanga ken Tarlac. “Nasken a mapapigsa ti intelligence network ti PNP ken dagiti checkpoints tapno maarestar dagiti umay agilaklako kadagitoy a botcha iti probinsia,” kinuna ni Gov. Singson. (ANL/BPP-PIA 1 Ilocos Sur)