PIA Press Release
Wednesday, January 11, 2012 Cebuano News: Mayor Cruz mipasabot sa P4.7 milyon nga nagugol sa dakbayan gikan sa ‘calamity fund’by Melvin T. Anggot ILIGAN CITY, Lanao del Norte, January 11 -- Mipasabot si Mayor Lawrence Lluch Cruz nga tinguha niya ang maampingon nga paggasto sa 5% calamity fund. Kini mao ang hinungdan nga anaa pa lamang sa 4.7 milyones pesos ang naggamit sa maong pundo taliwala sa nahimo nang ‘relief operations’ sulod sa tulo (3) ka semana human mihapak ang bagyong Sendong dinhi sa dakbayan. Mipasabot si Mayor Cruz nga labaw niyang gitinguha ang paghatag og permanenteng solusyon ngadto sa mga biktima sa paghapak ni bagyong Sendong dinhi sa Iligan sama sa pagpahiluna sa mga nawad-an og balay. Lakip usab niini ang pagpangandam sa posibleng panginahanglanon sa higayon nga mohinay na ang pag-abot sa mga donasyon sa pagkaon ug ubang kagamitan samtang tukoron pa ang mga balay sa mga ‘relocation sites.’ Sumala sa pamuno-dakbayan, wala na kaayo makuha-i ang ‘calamity fund’ alang sa pagpalit og pagkaon, gamit sa kusina ug uban pa gumikan kay daghan mang donasyon susama niini ang nagapang-abot sa Iligan. (CIO/PIA-10) | 
