PIA Press Release
Wednesday, January 11, 2012

Cebuano News: Dakbayan naglantaw sa pagpalambo sa produksyon sa Cacao

Matud pa ni City Agriculturist Leo Avila atol sa iyang pag bisita sa Davao Press Club’s usa ka sinimanang Kapehan sa SM nga gipahigayon diha sa Bluegre SM-Davao, ang dakbayan nagplano sa pagtanom ug cacao sulod sa 2,000 ka ektarya matag tuig. Si Avila nagsulti nga aduna na silay nakita nga 22,000 nga ekataryang yuta nga mao unya ang mamahimong lugar nga pagatam-nan sa cacao.

Ang city government-run central nursery nga maoy nag nag atiman sa pagpatubo sa 80,000 ka mga semilya sa cacao samtang ang mga pribadong nursery adunay 200,000 ka mga semilya sa ilang imbentaryo. Alang sa pagpakusog sa cacao na programa ang siyudad nagkinahanglan ug mukabat sa 1 milyon hantod sa 1.5 milyon mga semilya sa cacao, matud pa ni Avila.

Sila usab nakipahinabi na ngadto sa Small Medium Enterprises Development Councils alang sa pundo unya nga makatabang ngadto sa mga mag-uuma sa cacao dinhi sa dakbayan.

Ang ilang buhatan nagagamit sa tabang gikan Cocoa Foundation of the Philippines (CocoaPhil) ug ang Agricultural Cooperative Development International/ Volunteers in Overseas Cooperative Assistance (ADCI/VOCA) alang sa pagbansay sa mga mag-uuma partikular diha sa pamaagi sa pag patubo sa cocoa ug ang paghatag sa eksaktong mga semilya o binhi.

Samtang padayon nga nagahimo sila sa taas nga kalidad sa liso sa cacao, ang dakbayan naghunana sa pagpalit ug usa ka extruder usa ka kahimanan nga pagagamiton alang sa pag proseso ngadto sa tag-as nga kalidad nga cocoa powder ug butter.

Ang dakbayan adunay tumong nga mamahimong pinakadakong cocoa producing area sa tibuok nasud. Kasamtangan ang siyudad adunay luna nga 1,139 ka ektarya nga gigahin alang lamang sa cacao. Ang munisipalidad sa San Isidro didto sa Davao del Norte maoy nag una sa piankadaghan ug cacao dinhi sa atong rehiyon nga mikabat sa 4,000 ka ektarya nga natamnan sa maong tanom. (PIA-11/Albert D. Cahilog)