PIA Press Release
Wednesday, January 11, 2012 Cebuano News: “Anti-Smoking Ordinance” iimplementa sa Tupi GENERAL SANTOS CITY, Jan. 11 (PIA) –- Gilaumang mamahimong luwas sa aso kon “smoke free” ang Tupi, South Cotabato human giaprobahan, ug pagasugdan na ang implementasyon sa "Anti - Smoking" ordinance sa munisipyo karong umaabot nga petsa kinse sa Enero. Matud pa sa taho gikan sa lokal nga panggamhanan ang Ordinance No. 663 kon "An Ordinance promoting a Comprehensive Anti-Smoking Environment Policy" gipasa ug giaprobahan sa Sangguniang Bayan sa Tupi tong nilabay’ng tuig apan nalangan ang implementasyon niini tungod nga kinahanglan pa kining ripasohon sa mga myembro sa Sangguniang Panlalawigan (SP) sa South Cotabato. Tungod niini mipahigayon una ug “information campaign” ang lokal nga gobyerno ngadto sa kinse ka mga barangay sa munisipyo may kalabotan sa nasampit nga ordinansya apil na ang mga kalalat-an nga dulot sa aso sa panlawas sa tao. Sumala pa ni Konsehal Glenn C. Hatulan, Chairman sa Committee on Health ug awtor sa naasoy’ng ordinansa, gihingusgan niining maaprobahan ang maong ordinansa tungod para kini sa kaayohan sa tanan. Samtang gihangyo ni Dr. Virginia M. Sulit, TB Diagnostic Committee (TBDC) Chairman, ang mga kabatan-onan sa paglikay sa pagpanigarilyo ug giawhag niini ang mga magtutudlo nga mahimong modelo sa pag-amping sa panglawas ug kinaiyahan. (PGFruylan/PIA-Gensan) | 
