PIA Press Release
Thursday, January 12, 2012 Hiligaynon news: Pagbinuligay sang gobyerno lokal, pribado nga sekta ginpangabay ni RobredoKORONADAL CITY, Enero 12 (PIA) -- Nangabay si Interior and Local Government Secretary Jesse Robredo sa mga gobyerno lokal nga pabaskugon ang pakig-angot sa kada isa kag pagbinuligay sang pribado nga sekta. Sa iya pamulong-pulong sa 72nd Anibersaryo sa Pagtukod kag 12th Hinugyaw Festival sang Siyudad sang Koronadal, kahapon, ginhambal ni Robredo nga iduso sang DILG ang ideya inter-LGU partnership kon sa diin buligan sang manggaran nga gobyerno lokal ang mga imol nga LGU. Upod man sa ila ginaduso ang pagbinuligay sang mga katupad nga mga banwa kag siyudad. Halimbawa, suno sa sekretaryo, puwede magkasugot ang katupad nga mga gobyerno lokal nga mag-isa sa pagbakal sang fire truck o mga gamit para sa pagkaayo sang ila kalsada. Maayo man ini sa gilayon nga pagsabat sa mga peligro pati sa pagdumalasang higku kag iban pa nga mga problema pareho nga ginaatubang sang mga katupad nga gobyerno lokal. Samtang gintagaan punto man ni Robredo nga kinahanglan abri ang gobyerno lokal sa pribado nga sekta kag saghugpong sang katawhan sa sosyodad. Siling pa niya nga indi lang sa pagbantay sa maayo nga pagpalakat sang gobyerno ang malauman sa pribado nga sekta kundi pati man ang pagduso nga mangin matuod sang gobyerno lokal kag pagbato sini sang mga pumuloyo. Importante man siling niya ang pagpalapad sang pag-ugyon sang mga ara sa pribado nga sekta, mga hugp[ong sa katawhan sa sosyodad kag mga non-government nga hugpong tungod ginatiglawas niula ang mamumugon, mangingisda, mangunguma, mga netibo kag iban pa nga pumuloyo nga amo man ang ginaalagaran sang gobyerno. Upod man sa ginaduso sang DILG, suno kay Sec. Robredo ang institusyunalisasyon sang NGO kag LGU sa mga probinsiya, siyudad,banwa kag barangay. Ginbasa ni DILG Asistant Secretary for Mindanao Affairs and Special Concerns Nariman Ambolodto ang pulong ni Secretary Robredo tungod wala ini makaabot tungod kinahanglan dumalahan niya ang nabalita nga pahog sang terorismo sa Metro Manila dungan sa Pista sang Black Nazarene. (EBdelaCruz/PIA12) | 
