PIA Press Release
Thursday, January 12, 2012

Cebuano News: Sakay-Sakay festival sa siyudad sa Maasin gihuna-hunaan paga-dumalahon og pribadong grupo

MAASIN CITY, Southern Leyte, Jan. 12 (PIA) -- Ang “Sakay-Sakay” festival nga paga-himoon matag Enero 15 ning siyudad paga-atimanon na pohon sa usa ka pribado nga organisasyon susama sa “Sinulog” Foundation sa Cebu, usa ka pribadong pundok nga maoy tigpahigayon sa inila na nga mardi gras sa Cebu, sumala pa ni Royeno Segovia, ang Tourism Officer ning dakbayan.

Bisan unsang adlawa sa sunod bulan, nga natunong sab sa pagtimaan sa Pebrero ingon nga culture and arts month, si Segovia miingon nag-plano siya nga tawagon ang mga tourism ug cultural stakeholders sa dakbayan, uban ang mga eskperto sa events organizing ug pagmugna og foundation, alang sa duha ka adlaw nga seminar workshop nga maghisgut unsaon pagpatuman sa maong plano.

Atol sa senemana nga cable TV program “Action Center” ganinang buntag diin siya maoy guest, gibutyag ni Segovia nga ang local nga pangagamhanan ning siyudad nag-gahin nag pundo alang ning maong kalihokan, ang tino nga petsa maga-depende sa schedule sa mga dapiton nga mamumulong.

Karong Domingo, Enero 15, ang siyudad magpasiugda na sab sa “Sakay-Sakay” kon parade sa mga sakyanan sa dagat nga hupong sa mga mabulokon nga mga dayan-dayan, apan kadtong mosalmot sa banca category kinahanglan naa say ilang street dancing contingent nga dili mokubos sa 30 ka mga tawo, lakip na mga drummers.

Ang kalingawan karong tuiga naglakip na sa street dancing isip usa sa mga highlight sa bangga, kategoriya nga gilibkas na sa nangaging mga katuigan apan gibalik na sab gumikan sa hugot nga pagpaluyo ni City Councilor Atty. Romeo Geniston, si Segovia nagkanayon.

Dunay lima ka mga grupo, silang tanan pulos taga Maasin, ang nagpalista na nga moapil sa street dancing, nga mosunod dayon human sa fluvial procession gikan sa barangay Pasay ngadto na sa market area, dugang ni Segovia.

Matud niya nga ang street dancing anha mag-gunad atubangan sa Gaisano-Hyper sa dalan Espina boulevard alas 2:00 sa hapon, motuyok libot sa kadalanan sa siyudad maghunong-hunong katulo ka higayon aron sa pagsayaw, ug matapos sa bus terminal alang sa showdown sa tag lima ngadto sa walo ka minuto matag grupo.

First prize sa street dancing P 30,000, samtang ang ubang mga contests duna say ilang katugbang nga mga cash prizes.

Sa pangutana kon ang foundation nga iyang nahuna-hunaan makalihok na karong tuiga ug mao nay magdala sa “Sakay-Sakay” festival sunod tuig, si Segovia miingon puno siya sa paglaum nga mao na kana ang mahitabo.

Iya pa ganing giingon nga kon pormal nang mahipno ang organizational structure, ang bag-ong foundation mao nay mo-atiman sa mga cultural activities sa Charter Day celebration karong Agosto 10 ning tuiga. (PIA-Southern Leyte/bong)