PIA Press Release
Thursday, January 12, 2012

Waray news: RDRRMC-8 utro nga nananawagan para hin 'proactive' nga local disaster councils

TACLOBAN CITY, Leyte, Enero 12 (PIA) -- Ha butnga han padayon nga pag-inuran ha Sinirangan Bisayas, an Regional Disaster Risk Reduction and Management Council in utro nga nananawagan han mga local disaster councils nga padayon nga magin mabinantayon ngan magdumara han mga ginkikinahanglan nga mga pitad para maseguro an katalwasan han ira mga igkasi bungtohanon.

Ini in ginpahayag ni OCD 8 regional director ngan chairman han RDRRMC Rey Gozon dida han Suruswerte ha PIA nga programa ha radyo dida han Enero 10.

Sering ni Gozon nga dako an nagin progreso han local disaster councils dinhi ha Rehiyon. Hera in nagin mas aktibo ngan mas organisado, dugang pa niya. Pero, it sige-sige nga pagpahinumdum in mas nga magpapauro-upay ha ira, sering niya.

Mga pahibaro parti kamutangan han panahon in ginpapadara ngadto han mga kaangayan nga local disaster councils, sering ni Gozon. Ini in kinahanglan basahon hin maupay ngan tagan hin atensyon. An mga kinahanglanon nga mga pitad para pangandaman in kinahanglan pagdumaraon, dugang pa niya.

Nanawagan gihapon hi Gozon ngadto han mga local disaster council nga magpasabot hin maski ano nga mga insidente nga may problema dida han ira mga lugar ngadto ha RDRRMC.

An sigidas nga pag-inuran in may posibilidad nga magin kawsa hin pagbaha o pagtimpag han tuna dida han mga lugar nga kaudgan nagkakaada hin kalamidad dida han Rehiyon, salit nananawagan hi Gozon ngadto han mga nangungukoy ha mga higmubo nga mga lugar o mga ligid han bukid nga bumalhin la anay ngadto hin hiruhitaas nga lugar o mas herayo ha kadilikaduhan nga mga lugar.

An mga pamilya dida han mga lugar nga kaudgan nagkakaada hin kalamidad in kinahanglan nga magpreparar han ira mga kaangayan dad-on, sugad han pagkaon, tubig, mga medisina, flashlight, ngan mga dugnit, labot la hin iba pa.Importante gihapon nga kada meyembro han pamilya in tagan han iya kaangayan dad-on dida han ira pag-ebakwet, dugang pa ni Gozon.

An mga meyembro han pamilya in kinahanglan nga mag-aram kun hin-o an magtitimangno han kabataan ngan han pinakalagas nga meyembro han pamilya, sering ni Gozon.

Dida han ginpagawas nga pahimatngon han NDRRMC parti hin makusog nga hangin dida han Enero 10, nanawagan hi Gozon ngadto han mga mangirisda nga mayda mga gudti nga sakayan nga diri pumalawod meyetras an mga dagko nga mga sakyanan in gin-aabisuhan nga magin mabinantayon kuntra dagko nga mga balud.

Ngan ha pagtapos, nanawagan hi Gozon ngadto han mga motorista nga magin mabinantayon ngan maglikay dida hit ira pagbyahe mahitungod nga kun nag-iinuran an mga kakalsadahan in nagigin madalunot nga nagigin kawsa hin mga aksidente. May mga panahon sugad dida han Enero 10 nga waray ka nahihikit-an mahitungod han makusog nga uuran, sering ni Gozon. (Translated by MAA/PIA-8)