PIA Press Release
Thursday, January 12, 2012

Cebuano News: Dakbayan sa Iligan nagkinahangla’g P1.5B alang sa rehabilitasyon ug pagkaayo human sa kalamidad

ILIGAN CITY, Lanao del Norte, Jan. 12 (PIA) -- Mibutyag si Architect Gil Balondo nga mokabat ngadto sa P1.504 bilyones ang panginahanglanong pundo sa dakbayan aron mapabarog og balik ang mga imprastraktura ug kabtangan nga nagguba gumikan sa paghapak ni bagyong Sendong tulo ka semana na ang milabay.

Sumala sa City Planning and Development Coordinator, naglangkob niini ang P507.5 milyones alang sa pag-ayo sa mga dagko ug gagmay’ng tulay; P20 milyones alang sa pag-ayo sa Hinapanon wells; P548.41 milyones alang sa flood control ug drainage; P10 milyones alang sa pag-ayo sa Santiago seawall; P15.7 milyones alang sa pag-ayo sa mga school buildings; P3.1 milyones alang sa pag-ayo sa mga mga health center; P7 milyones alang sa pag-ayo sa mga day care center; P350 milyones alang sa housing and resettlement; P5 milyones alang sa garbage dumpsite control rehabilitation and closure; P19.7 milyones alang sa rehabilitasyon sa agrikultura; ug P18 milyones alang sa pag-ayo sa mga banca ug fishing gears sa mga apektadong mananagat.

Tinguha sa kagamhanan sa siyudad nga mapangayo ang maong kantidad sa nagkalain-laing ahensiya sama sa Department of Public Works and Highways (DPWH), Department of Interior and Local Government (DILG) ug National Disaster Risk Reduction Management Council (NDRRMC) alang sa mga imprastraktura; Department of Education (DepEd) alang sa mga gambalay sa mga tunghaan; Department of Health (DOH) alang sa mga health center; Department of Social Welfare and Development (DSWD) alang sa mga day care center; National Housing Authority NHA) alang sa dugang pundo sa pabalay; ug Department of Agriculture (DA) alang sa naggubang agrikultura. (CIO/PIA 10-LDN)