PIA Press Release
Friday, January 13, 2012 Hiligaynon News: Roxas City PNP magapatuman sang e-blotterni Alex A. LumaqueSYUDAD SANG ROXAS, Capiz, Enero 13 (PIA6) -- Magatambong ang tiglawas sang Roxas City Police Station (RCPS) sa patigayunon nga training sa electronic blotter (e-blotter) sang Police Regional Office (PRO) -6 sa masunod nga semana sa syudad sang Iloilo. Ginpahayag ni C/Supt. Ciprinao E. Querol, Jr. nga amo ang direktor sang PRO – 6 nga ang natalana nga paghanas sa e-blotter ang kaangut sa mga pamaagi sang PNP nga mangin mapaayo pa ang pagdokumento sang krimen sa bug-os nga pungsod. Samtang ginpasiguro man ni Querol nga pagahimuon ang RCPS bilang isa sa mga pilot nga police station para sa proyekto. Si Querol ang nangin dinapit nga bisita sa turnover of command ceremony sang RCPS sang Enero 12 kon sa diin ginpahamtang si Supt. Salvador Dagoon bilang bag-o nga hepe sang Roxas City PNP nga nagbulos kay Supt. Kashmir Disomangcop. Nahibaluan nga may gin-develop nga software ang PNP Information Technology Management Service (ITMS) nga iga-install sa computer sang mga police station subongman mga yunit sang PNP agud nga mahibaluan ang nagakahinabu sa nagkalainlain nga mga lugar para sa mas madasig nga pagrespondi kag mas epektibo nga kampanya kontra kremin. (JSC/AAL-PIA 6 Capiz) | 
