PIA Press Release
Saturday, January 14, 2012 Cebuano news: Programa sa kinaiyahan nag-unang gimbuhaton sa Misamis Occidental sa 2012by Pat Nano OROQUIETA, Misamis Occidental, Jan. 14 (PIA) -- Bisan sa makalilisang nga panghitabo sa mga silingang probinsya sa Amihanang Mindanao bunga sa kalamidad nga mihapak niini, bag-ohay pa lamang. Apan alang sa kagamhanang probinsyal nga dili pa ulahi ang tanan aron kini mapangandaman ug malikayan labina ang lihok sa kinaiyahan. Atol sa gipahigayon nga panagtagbo sa mga kadagkoan sa kapitolyo nga may kalambigitan ang 2012 development plan, usa gayud ang programa sa kinaiyahan ang nanag-unang pagatutokan sa kagamhanang probinsyal niining tuiga, pinaagi sa mga rekomendasyon nga gisumiter ni Dennis Leopoldo sa Environment and Natural Resources Office (ENRO). Kini nga programa, hingusgan sa kagamhanang probinsyal gumikan kay dili buot ang mga kadagkoan nga ang nahitabo sa mga silingang probinsya, mahitabo usab dinhi. Apan nakasiguro ang mga opisyales nga ang nahitabo sa ubang dapit, dili kini mahitabo sa probinsya gumikan kay dili pa kaayo labihan ang mga kalihukan sa pag-abuso sa kinaiyahan labina sa Bukid Malindang bunga sa kasamtangang mga programa nga kagamhanang probinsyal nga nagpanalipod sa kinaiyahan. Apan kun’ dili kini masanta niini pa lamang mga panahona, duna gayu’y posibilidad nga mahiagom usab niini ang mga nagkadaiyang kalamidad. (PIO/PIA-10) | 
