PIA Press Release
Saturday, January 14, 2012

Cebuano news: Gov. Ramiro mitunol sa hinabang ngadto sa adunay anak nga gi-hydrocephalus

OROQUIETA, Misamis Occidental, Jan. 14 (PIA) -- Kaluwasan sa kinabuhi sa usa ka anak gikan sa usa ka talagsaon nga balatian ug kaluwasan gikan sa kalisod nga kahimtang sa inadlaw- adlawng panginahanglanon ilabina sa pagkaon ang nakahatag og kaisog sa usa ka inahan sa pagduol labina gayod ngadto sa buhatan ni Governor Hermie Ramiro sa kapitolyo aron sa pagpangayo og tabang.

Si Aniceta Gonzaga Mañabo, 35 anyos, nagpuyo sa Purok Uno Barangay Talic, Oroquieta City ug may duha (2) ka mga anak ug gipasagdan na lamang sa amahan sa iyang mga anak ang miduol sa buhatan ni Gov. Ramiro aron sa pagpangayo og tabang alang pagpatambal sa iyang anak nga si King James Gonzaga Mañabo, nga napulo pa lamang ka bulan nga nag-antus karon sa usa ka talagsaong balatian nga hydrocephalus ug sa ayuda sa ilang inadlaw-adlaw nga pagkaon, sanglit dili naman siya makapangita ug panginabuhi kay siya man mismo ang nag-atiman sa iyang anak nga may hydrocephalus.

Ang pagduol ni Mañabo sa buhatan sa gobernadora ang wala gayod makawang sanglit mihatag usab gilayon si Governor Ramiro sa hinanaling tabang salapi.

Ug usa pa niini, mao ang pagpahimo sa usa ka dokumentasyon sa tinuuray nga kahimtang ni Mañabo ug sa iyang anak nga si King James nga adunay hydrocephalus pinaagi sa Provincial Media sa gobernador ang Tingog Misamisnon, aron usab ikapakita kini ngadto sa Bantay Bata 163 alang sa tabang usab niini ug usab aron ikapakita ngadto sa uban nga mga kaigsoonang Misamisnon nga adunay mga malumong mga kasingkasing nga andam mohatag usab sa ilang ayuda og tabang alang sa pagpatambal ni King James.

Ubos sa kamandoan ni Gov. Ramiro, gihimo gilayon sa Tingog Misamisnon Channel ang aktwal nga pakisusi niini didto mismo sa ilang panimalay.

Kini nga mga pasiunang tabang ug ayuda gikalipay pag-ayo ni Mañabo.

Og dili lang si Mañabo ang nalipay, kon dili nangalipay usab ang iyang mga silingan nga usa usab sa mga nag-ampo sa Ginoo nga adunay moabot nga mga tawo nga mas makatabang pa sa kahimtang ni Anecita ilabina ni King James.

Mipadangat usab sa ilang panawagan ang mga silingan ni Mañabo ngadto sa ubang kaigsoonang Misamisnon sa pagtabang niini, sa paggahin bisan sa ginagmay lamang niining mga ayuda alang sa kaayuhan ni King James. (PIO/PIA-10)