PIA Press Release
Monday, January 16, 2012 Cebuano News: Pag-atiman sa Labo River ug mga dagkong kasubaan tutokan sa Misamis Occidental ning tuigani Pat NanoOROQUIETA CITY, Misamis Occidental, Jan. 16 -- Nakigdugtong na karon si Governor Herminia Ramiro ngadto sa mga lokal ug nasyonal nga ahensya kagamhanan nga adunay kalimbigitan sa kinaiyahan nga mamugna og usa ka lakang nga nakatutok sa pag-atiman sa mga dagkong kasubaan sa tibuok probinsya labina ang Labo. Atol sa gipahigayon nga pagpakigtagbo sa gobernadora ngadto sa mga kadagkoan sa kapitolyo bag-ohay pa lamang, iyang gipadayag nga kinahanglan gayud nga sa labing dali nga panahon, hatagan og dakong pagtagad ang mga kasubaan gumikan sa dakong mahatag nga kadaot niini sa higayon nga adunay makusog nga mga pag-ulan. Gihimong panag-ingnan sa gobernadora ang nahitabo sa Iligan City ug Cagayan de Oro City. Usa sa hinungdan niini, mao ang wala nay mga dagkong kahoy nga nagbarog sa kadaplinan, pagkamabaw sa suba ug labina ang pagtuyhakaw sa mga kabalayan ug mga katukuran kilid sa mga suba. Buot sa gobernadora nga gawas sa halapad nga ‘reforestation’ sa mga ‘river banks,’ kinahanglan nga ma-‘survey’ sa mga ‘engineer’ ug mga ‘environmentalist’ ang tinuod nga hulagway sa mga kasubaan aron mahatagan gilayon kini og remedyo kun’ kini posibleng makahatag og kadaot sa kinabuhi sa katawhan sa higayon nga adunay taas nga panahon sa pagbundak sa ulan. (PIO/PIA-10) | 
