PIA Press Release
Monday, January 16, 2012 Waray news: Pag-Ibig na-offer hin penalty condonation program para ha mga delinkwente, diri nakarehistro nga mga employer TACLOBAN CITY, Leyte, Enero 16 (PIA) -- Tikang ha Enero ngadto ha Hunyo 30, 2012, an mga delinkwente ngan diri nagpakarehistro nga mga employer in gintatagan hin unom ka bulan para han condonation of penalty han Home Development Mutual Fund o Pag-Ibig Fund. Ini in ginpasabot ni Kevin Siosana, an Information Officer han Pag-Ibig Fund Tacloban dida han Enero 13 han gindumara nga Harampang ha PIA, senimana nga pakig-aragtubang ha mga taga-media nga gindumara ha Philippine Information Agency regional office. An Pag-Ibig membership coverage in ha pagkayana usa na kumon nga kinahanglanon ha ilarum han Republic Act 9679 o an Home Development Mutual Fund Act of 2009, sering ni Siosana. “This means that every employed Filipino should be a Pag-Ibig member and enjoy its benefits,” sering ni Siosana. Pero ha luyo hini, nahibaruan nga damo la gihapon nga mga employer in padayon nga diri nakarehistro ngadto ha Pag-Ibig tikang han paggawas han bag-o nga balaudnon nga umepekto dida han Enero 2010. Ha ilarum han HDMF Circular No. 399, an programa in nag-uupod han mga employer nga waray i-enrol an ira mga empleyado ha Pag-Ibig ngan ngadto han waray mangulekta han membership contributions.. An programa in nag-uupod hadton mga employer nga waray pa magparehistro ngan hadton mga delinkwente, sugad man han mga employer nga may empleyado nga pwede masakop han Pag-Ibig diin waray hira magkolekta han membership contributions. An mga employer nga nag-iban pero waray mag-remit han membership contributions ngan han 0 short term loan amortizations tikang ha ira mga empleyado in diri upod hini nga penalty condonation. An diri nagpakarehistro nga mga employer nga karuyag makatagamtam han programa in kinahanglan magparehistro ngadto ha HDMF pinaagi han ira Online Employer Registration System antis mag-apply para han penalty condonation antis Hunyo 30, 2012. Dida ha pag-apply para han penalty condonation, an mga employer in kinahanglan magbayad han mga kuntribusyon han ira mga empleyado para han current remittance period ngan para ha mga masunod nga mga bulan. Kun diri ini masunod, an kaangayan nga mga penalidad in babayaran. An mga aplikasyon para han penalty condonation in ig-aaprobar o ig-di-disaprove ha diri malahos duha kabulan tikang ha petsa ha paghatag han kompleto nga mga dokumento. Kaaprobar han aplikasyon para han penalty condonation, an mga employer in may alternatibo pagbayad hin tigda o pinaagi hin plano hin pagbayad nga igsusumite ha sulod hin pito ka adlaw ngan diri malapos han ika-25 kaadlaw tikang ini in maaprobaran. Kun diri ini masunod, an pag-aprobar in mawawarayan bisa. An mga agaron in ginkikinahanglan nga magbayad han ira bahin tikang dida han kaaprobar han aplikasyon ngan an mga dibidendo kaangayan nakuha mahitungod han kaatrasar. An pagbayad in kinahanglan bug-os ha sulod hin 30 ka-adlaw tikang han kaaprobari han aplikasyon para han penalty condonation. Para ngadto han mga employer nga waray magka-aaprobari an mga aplikasyon in kinahanglan nga magbayad han ngatanan nga mga kontribusyon, an mga urhi nga kinahanglan mabayda para han ira mga meyembro kaupod an mga penalidad, interes ngan mga dividendo. An diri makabayad han nasabi nga kontribusyon in magreresulta han pagdumara han katugbang nga legal nga aksyon kuntra han delinkwente nga mga employer. Para hin dugang nga impormasyon, an mga interesado in pwede bumisita ngadto ha opisina han Pag-Ibig ha siyudad han Tacloban, sering ni Siosana. (Trans. by MAA/PIA-8) | 
