PIA Press Release
Monday, January 16, 2012

Cebuano news: Rehiyonal nga paugnat sa kusog magduso sa turismo sa Maasin City

MAASIN CITY, Southern Leyte, Jan. 16 (PIA) -- Ang pagdala ning dakbayan sa Eastern Visayas Regional Athletic Association (EVRAA) sports competition karong bulana magsilbi usab nga kahigayonan sa pagduso ning maong dapit ingon nga dulaanan kon lugar nga kalingawan dili lamang sa Region 8 kon lukop sa nasud.

Aron mapahimuslan ang pag-dis-og sa maong pamatyag nunot sa gilaumang pagdagsang sa kapin sa 6,000 ka mga bisita nga apil sa EVRAA Enero 29 – Pebrero 4, ang City Tourism Office mang-hakad og mga tarpaulin palibot sa siyudad nga magmantala sa mensahe “Come and discover . . . it’s more fun in Maasin City,” sumala pa ni City Tourism Officer Royeno Segovia.

Ang naasoy nga pulongon gisundog gikan sa linya nga nahimong inila pinaag sa Department of Tourism (DOT), ang “It’s more fun in the Philippines”, kampanya nga mismo nag-tinguha pagdani og minilyon ka mga turista nga moanhi sa Pilipinas karong tuiga.

Diha sa cable TV program “Action Center” sa miaging semana, si Segovia mi-angkon nga iya gyong dakpon ang atensiyon sa mga bisita sulod sa ilang usa ka semana nga pagpuyo ning siyudad para sa EVRAA aron ikapa-hinumdom kanila ang katakus sa siyudad sa anindot nga kalingawan.

Ang iyang kadasig ug kompyansa napasulbong tungod sa gidahum nga pagbukas bisan unsang panahona sa Maasin Nature and Wildlife Part adto sa Danao Forest Park.

Ang family-oriented nga theme Park mahimo unyang pinuy-anan sa tagsa ra makit-an nga mga ihalas nga mga mananap, nga paga-korawon aron ang mga bisita makahimo sa pagduol ug bisan gani sa pagpakaon, si Segovia mitahu, ug gidugang niya nga ang uban pang attractions nga makit-an mao ang pagsakay og kabayo ug off-road nga mga sakyanan alang sa mga kabataan.

Ang nahisgutan nga Park gi-target nga buksan sulod niining unang tulo ka bulan sa tuig, o sa unahan pa nga mga petsa, depende kon naa na ba ang papuy-on nga mga hayop aron ika-deklara na nga operational ang maong dapit, si Segovia miingon.

Gawas ning tali-bukas na nga theme park, ang ubang atraksyon sa siyudad mao ang iyang nailhan na nga mga dagkutanan alang sa mga relihiyoso, ug ang busay ug langob sa Guinsohotan alang sa mga mahilig sa adventure kon kulba-hinam nga mga lakaw, ug naa say mga beach resort naglumbay sa kabaybayonan.

Gitahu ni Segovia nga sa 2010, kapin sa 30,000 ka mga turista ang nangabot sa siyudad segun sa talaan sa mga hotels ug restaurants, ug sobra sa 2,000 ning maong gidaghanon mga turistang langyaw.

Karon nga naa nay desenting mga dapit nga ka-shopping-ngan sa siyudad, nuntan sa agresibo nga kampanya alang sa theme park ug mga naandan nga tour sites, si Segovia miingon daku ang paglaum nga mas mosaka pa ang gidaghanon sa mga manganhi sa dakbayan. (PIA-Southern Leyte/bong)