PIA Press Release
Tuesday, January 17, 2012 Cebuano News: Gov. Ramiro nanawagan sa katawhan sa pag-alayon sa pagpanalipod sa kinaiyahanby Pat NanoOROQUIETA, Misamis Occidental, Jan. 17 -- Bisan si Governor Herminia Ramiro, adunay kasakit kun trauma gibati bunga sa nahitabong katalagman sa Iligan City ug Cagayan de Oro City miaging bulan kon diin gatosan ka mga kinabuhi ang nakalas ug pagkadaot sa mga imprastraktura ug kabtangan sa mga apektadong lumulupyo sa maong mga dapit. Kini ang hinungdan nga sa matag karon ug unya adunay gihimong pagpakigtagbo ang hepe ehekutibo ngadto sa mga nanag-unang ahensya sa kagamhanan nga nagtutok sa kinaiyahan aron sa tuyo nga iyang mamonitor kun’ unsa na ang gidangatan sa gipatumang programa. Apan nakita sa gobernadora nga ang kooperasyon sa katawhan ang adunay mas epektibong pamaagi nga mapanalipdan ang kinaiyahan gumikan kay direkta kining makasaksi ug makakita sa kahimtang sa ilang tagsa-tagsa ka mga dapit. Hinungdan nga sa subsob nga pagpahigayon sa Disaster Preparedness Program karong tuiga, apil gayud sa training o seminar workshop ang mga pamaagi sa pagtaho ngadto sa tukmang ahensya aron masumpo gilayon kini sa dali nga panahon. Nangayo usab og despensa ang gobernadora ngadto sa mga negosyante nga apektado sa programa gumikan kay iyang gitan-aw ang kaayohan sa kinabag-an ug dili lamang sa pipila ka mga indibidwal nga nagnegosyo niini. Sa pagkakaron ang kagamhanang probinsyal, nakatutok sa mga programa ug proyekto nga nagtumong sa mga ‘precautionary measures’ gumikan kay mas dako og mahatag nga kadaot ang kinabuhi, kabtangan ug imprastraktura kon dili mapangandaman ang maong panghitabo. (PIO/PIA-10) | 
