PIA Press Release
Tuesday, January 17, 2012 Hiligaynon News: Mga Pinoy nga tripolante sa nagkulob nga barko luas na - DFAManila, Enero 17 (PIA) -- Ang 296 ka mga Pilipino nga tripolante sang Italian luxury cruise ship nga Costa Concordia ang hilway na suno sa pahayag sang Department of Foreign Affairs (DFA). Ang Embahada sang Pilipinas sa Roma ang nagpahibalo sa DFA nahanungod sa sitwasyon sang mga Pinoy nga naluas kag ginatuyo nga papauli-on. Ang Costa Crociere S.P.A., ang kompanya nga nagapanag-iya sang naglugdang nga sakayan, nagasugod sa karon sa pagpatigayon sang repatriation flights sang mga crew members. Ang Costa Concordia ang halin sa baybayon sang Tuscany kag ini ang naglugdang sang Enero 14 nga may kabilogan nga 4,229 ka pasahero kag tripolante, kalabanan sa mga biktima ang gindala sa isla sang Giglio pagkatapos sang amo nga hitabu. Tatlo ka mga Pinoy nga tripolante ang na-report nga ginsulod sa ospital sang Grosseto bangod sang samad nga naangkon sang mga ini sa amo nga insidente. Suno sa DFA, ang Costa Crociere S.P.A. ang naghatag na sang opisyal nga listahan sang mga Pinoy nga tripolante sa emergency response team sang Embahada sang Pilipinas. “Ginapaseguro gid sang Costa Crociere S.P.A. nga ila pagasabton ang full compensation sang mga Pinoy crew members, pagabayaran ang ila nagkaladula nga mga kagamitan kag mga kwarta kag sila maga-isyu man sang formal letter of undertaking nga nagapamatuod sang ila pagkakomitido,” ang dugang nga pahayag sang DFA. (JSC/LCR-PIA6) | 
