PIA Press Release
Tuesday, January 17, 2012

Waray News: Syodad han Borongan nag-aprobar hin P400M nga badyet

BORONGAN CITY, Eastern Samar, Jan 17 (PIA) -- Gin-aprobaran han Sangguniang Panlunsod (SP) han bag-o nga syodad han Boronga in maabot P412.720 milyon nga badyet para hiton tuig 2012.

Sumala hin report, hine nga pondo, P27.7M milyon in hingangadto han opisina ni city mayor, Ma. Fe Abunda para han iya Barangay Development Programs.

Una hine, nagpahayag hi Mayor Abunda nga hingyap niya an pagpaupayan han mga flood control projects ha pira nga barangay han Borongan bisan pa an aadi ha sentro han syodad.

Tungod ine, kay ha nahitabo nga sigidas nga uuran, kinita han Mayora in mga pagbaha ha pira nga lugar dida han sentro han syodad tungod han mga barado nga kanal ug mga hibang nga imbornal.

Salamat nala daw, sering niya han bag-o nga pondo han syodad kay iya mapapatuman an iya mga panguna nga mga proyekto.

Dugang pa han report nga an bag-o nga IRA in magreresulta han katudlok han mga opisyal han mga bag-o nga gintukod nga mga opisina sugad han: City Environment and Natural Resources Office, Information Office, General Services Office, Office of the Veterinarian, Cooperative and Development Officer, Population Officer etc.

Pira han mga pagkakagastohan daw han 2012 nga pondo an masunod: road widening -P5 milyon; pagpakaupay han merkado - P4 milyon; pagpakaupay han Hamorawon Park - P5 milyon; pagpalit han kanan syodad sarakyan - P2.5 milyon; paghimo han covered court - P2 milyon, health centers - P1 milyon; mga paghimo hin mga kanal - P15 milyon ug day care centers - P2 milyon.(PIA-Eastern Samar/aenicart)