PIA Press Release
Wednesday, January 18, 2012 Aklanon News: Aklan magatao it bulig-pinansyal sa mga biktima it kalamidadni Venus G. Villanueva KALIBO, Aklan, Enero 18 (PIA6) -- May kabilugan nga P1,080,000.00 nga bulig pinansyal ro igatao it gobyerno probinsyal sa mga biktimang Aklanon tuga it maeain nga tiyempo sa Taba-ao, Banga ag sa Poblacion ag Barangay Tambak sa New Washington, Aklan. Ro mga biktima sa Taba-ao, Banga, hay nadueaan it baeay bangud sa pagkatimpa it eugta kon siin ro baeay nanda hay gin-anod it mabaskog sa sueog it tubi it suba, samtang ro sa New Washington, Aklan hay naguba ro mga baeay ag ro iba hay nasamaran. Ro pagpanupod it bulig hay pagahiwaton sa Enero 19 sa Conference Room it Provincial Guest House sa pagpanguna ni Governor Carlito S. Marquez ag paga-asistiran nanday Suzette Pioquid, Provincial Treasurer ag Elma Malbas, Provincial Social Welfare and Development Officer. Suno kay Malbas, ro 17 nga mga biktima ag panimaeay sa Banga nga nagub-an it baeay hay magabaton it P30,000 kada isaea ukon may kabilugan nga P510,000.00. Sa pihak nga parte, ro mga biktima sa New Washington nga nagub-an it baeay nga 14 ka pamilya, hay magabaton it P20,000.00 kada isaea, nga may kabilugan nga P280,000.00 samtang rong mga nasamaran it baeay nga 58 ka pamilya hay magabaton it P5,000.00 kada isaea ukon P290,000.00. Halin sa Quick Response Fund it 5% Calamity Fund ro pundo nga igapanupod sa mga biktima. Ginpaathag man ni Malbas nga mas mabahoe ro balor it Calamity Fund sa mga biktima it Banga hay bangud magahalin sanda it paobrahan ku andang mga baeay nga maeayo sa suba ag maga umpisa eon man sanda sa uno, samtang ro sa New Washington hay idto eamang sa dati nandang mga lugar. Sa makaron, nagahiwat ro probinsya it pag-akad it suba agud indi mageapaw ro tubi ag maapektuhan ro pag operar it kanae it National Irrigation Administration (NIA) nga makatao it piligro sa mga kaeanasan sa tatlong ka mga banwa- Banga, Kalibo ag New Washington ag sa Kalibo International Airport (KIA) nga sa tunga man it kaeanasan it Pook, Kalibo. (JSC/VGV-PIA 6 Aklan) | 
