PIA Press Release
Wednesday, January 18, 2012

Hiligaynon News:Dinagyang Food Fests magabukas buwas

SYUDAD SANG ILOILO, Enero 18 (PIA6) -- Sa masunod nga apat ka adlaw, pila sa mga lugar sang sining syudad ang pagapun-an sang hamot kag sabor sang nanuhaytuhay nga mga linuto nga Ilonggo nga pat-ud gid magaganyat sang gana sang sin-o man – mangin manughugyaw, bisita kag bisan mga lokal nga magakadto sa sining siyudad para sa tuigan nga Dinagyang Festival.

Ang Dinagyang Food Festivals sang Iloilo Hotel Resort and Restaurant Association nga pagahiwaton sa may bahin sang Delgado Street kag sang iya sang SM City nga patigayunon sa car park sini ang natalana magabukas buwas, Enero 19 tubtub 22.

Ginsiling ni IHRRA Dinagyang Food Festival Chairman Jun Lee nga 36 sang ila mga katapo ang magapasakop sa sini nga tuig nga food festival nga nangin isa naman ka atraksyon sang sining tuigan nga religious kag cultural nga kahiwatan sang siyudad.

Suno kay Lee ila nanotisyahan nga ginatan-aw sang mga tawo ang food festival nga starting point sang Dinagyang Festival gani sa masami ila ini ginabuksan kung Huwebes.

Ang mga diners sa sini nga bahin sang siyudad indi lamang makasabor sang mga bantog nga pagkaon apang iban pa nga linuto sang mga nagapasakop nga hotel kag restaurant kasubong sang Amigo Terrace Hotel, La Fiesta Hotel, Tatoy’s Manokan, Ocean City, Mang Inasal, kag Damires Hill kag iban pa apang paga-entertinahon man sang mga live band humalin alas sais sa gab-i tubtub alas dose sa tungang gab-i.

Gindugang ni Lee nga ang kahiwatan nangin isa man ka palaagyan para sa ila mga katapo nga mapakilala ang ila mga lugar kag ang ila matanyag ilabi na sa bahin sang pagkaon.

Samtang ginsiling ni SM City Marketing Officer Janrae Aguilos nga ang SM Dinagyang Food Festival pagapasakupan sang mga tenant sang food court sang mall nga magatanyag man sang mga pagkaon nga ila ginaserbe.

Magasugod ang SM Dinagyang Food Fest alas kuwatro sa hapon sa car park sang mall. Sa masunod nga duha ka adlaw maga-usher ini sa pagahiwaton nga Dinagyang Pyroolympics: 2012 Luces in the Sky, kumpetisyon sang firework humalin Enero 19 kag 20 sumugod alas 7 sa gab-i. (JSC/LAF-PIA6 Iloilo)