PIA Press Release
Wednesday, January 18, 2012 Maguindanaon news: Lokal a prubinsya nu N. Cotabato nanginggay sa 6 a multicab, 12 a motorsikloKORONADAL CITY, Ene. 18 (PIA) –Inidtukel-tukel kanu kinapanginggay nu animtiman a multicab endo sapulo enggo duwa a motorsiklo kanu gugunay a minukit a gay nu lokal a guberno nu prubinsya nu North Cotabato sa mga barangay, kapulisan endo pila a mga opisina.Kanu isa a turn over ceremony kanu niya a minukit a padian, inisampay kanu kainggay ni Gov. Emmylou “Lala” Taliño- Mendoza su telutiman a multicab sa mga opisina nu barangay Kadingilan, Pigkawayan, Barangay Poblacion sa Libungan endo sa Barangay Simbuhay sa Kabacan. Kaped inya kanu galabaken nu Lokal a guberno nu prubinsya a one barangay, one project a pagatud kanu kainggay sa tig-satiman a multicab su uman e isa a barangay kanu sakop nu prubinsya labi lawan kanu mawatan a parti nu lugar andu makanggulalan kanu katabang sa nisisita nu medical kanu kanilan a peddadalapa ataw ka sa maginged. Isa inya kanu kangagan a kasigkel nu mga pasyente sa pinakamasiken a rural health center ataw ka hospital. Ininggay manem su telu timan a multicab sa fisheries section nu Office of the Provincial Agriculturist, Civil Security Unit nu prubinsya, endo sa Cotabato Task Force a pagusalen sa kapadtuman kanu kanilan a mga galabaken. Kagina ka maytu, ininggayan bon ni Gov. Taliño Mendoza su Provincial Police Office a mana su kaunutan a provincial director P/SSupt Cornelio Salinas kanu sapulo enggo duwa a motosiklo. Sugo kanu galabaken a labi mas mangagan su police visibility ataw ka kadtulik kanu mga highway nu North Cotabato. Kanu kina salangan sa turn over, inipayag bon ni Gov. Taliño-Mendoza a aden ininggay a pondo a P15 milyon su partylist a Trade Union Congress of the Philippines (TUCP) a paguman sa P10 milyon a pondo para sa multicab project nu lokal a guberno nu prubinsya. Babalapantagan inya, tigin nu gubernadora, a kapaguman sa pitupulo enggo lima a multicab a mapakay ipanginggay kanu kaped pen a mga barangay a sakop a North Cotabato. Salangan kanu pakalagian, midsukol-sukol si Gov. Taliño-Mendoza sa mga tagapada nu lokal a guberno nu prubinsya langkop kanu kawani nu LGU a tumabang para makasiguro kanu sugat a kabpanggastu kanu pondo nu guberno endo tabang a kabpadtipid a sabapan kanu anduken aden kanilan a natimo a masla a pondo a para sa nadtelu a pruyikto. (HMYoshioka/PIA) | 
