PIA Press Release
Wednesday, January 18, 2012 Cebuano News: 2012 nga pundo para sa mga proyekto sa So. Leyte mapagawas na karong bulana -- DPWHni Bong Pedalino MAASIN CITY, Southern Leyte, Jan. 18 (PIA) -- Sa pagsugod ning tuiga, ang District Engineering Office ning lalawigan gikatakda nang makadawat sa tibuok 2012 nga pundo, ug labing una kining mahitabo, tungod kay sa nanglabay nga mga katuigan ang pagpagawas sa pundo sagad malangan sa mga unom ka bulan. Kini ang nasudnon nga pamaagi nga gituyo sa pagpalagsik sa ekonomiya sanglit ang salapi motuyok-tuyok sa tibuok nasud inig pagpatuman na sa lain-laing mga public works projects, si Carlos Veloso, district engineer, nagkanayon sa press conference kagahapon didto sa DPWH Function Hall. Sa miaging tuig, ang mga tigsaway mibuyag sa DPWH gumikan kay wala kini makapagawas sa pundo nga sayo-sayo pa nga unta kini makapa-dasig man sa ekonomiya. Karong tuiga, ang DPWH mopabali ning maong hulagway pinaagi sa pagpagawas sa funding nga mas sayo, karong unang bulan sa tuig, si Veloso mipasabot. Matud niya nga may kinatibuk-ang P 145,432,000 ang pundo nga i-release-say bisan unsang adlawa karong bulana para sa Southern Leyte Engineering District (SLED) gitakda alang sa mga tino nga mga proyekto. Ang maong kantidad alang sa lima ka proyekto, upat niini na-bidding na, sama sa pag-palapad sa national road Tomas Oppus street sa dakbayan sa Maasin alang sa duha ka seksyon kantidad P 5.456 million, San Ricardo-Bil-atan road P 5 million, ug pagpalambo sa Daang Maharlika P 10,976,000. Gikatakdang bidding-ngon sunod bulan mao ang pag-hingpit na sa tulay sa Subang Daku sa Sogod kantidad P 124,000,000. Kon dunay sobra sa maong kantidad, kini paga-gamiton alang sa pag-palambo sa tulo ka daan nang mga tulay sa barangay Combado ug Tunga-tunga sa Maasin City, ug sa barangay San Roque, Macrohon, ni Veloso pa. (PIA-Southern Leyte/bong) |
