PIA Press Release
Thursday, January 19, 2012 Cebuano News: Model house gisugdan na pagtukod didto sa Sta. Elena relocation siteni Boy Decena / Melvin T. Anggot ILIGAN CITY, Lanao del Norte, Jan. 19 -- Gisugdan na pagtukod ang modelo sa mga balay nga ipahimutang sa 15.99 ektarya nga luna didto sa Barangay Sta. Elena isip usa sa mga relocation sites sa libo-an ka mga Sendong ‘survivors’ dinhi sa dakbayan sa Iligan. Natigayon ang ‘ceremonial build’ alang niini milabayng adlawa pinaagi nila ni Mayor Lawrence Lluch Cruz ug sa mga kadagko-an sa Gawad Kalinga pinanguluhan sa GK founder nga si Tony Meloto. Giatol ang maong okasyon sa ika-62 ka tuig nga kasumaran sa pagkatawo ni Meloto. Gikan sa project site, mibisita ang GK founder sa GK Missionville sa Canaway, Tibanga kauban ang lokal nga mga lumilihok sa GK ug sila si Mayor Cruz ug unang ginang Gina Cruz. Sa usa ka simpleng programa mipabati si Meloto sa iyang pagdayeg sa tutok ug politikanhong kabubut-on ni Mayor Cruz nga gilayong ipatuman ang permanenteng panimalay alang sa mga Sendong survivors. Dugang nasayran nga nahidangat na sa Iligan ang mga GK volunteers gikan sa Compostela Valley, Zamboanga, Bukidnon ug Sultan Kudarat aron mosalmot sa sugod nga pagtukod sa mga balay didto sa Sta. Elena karong Enero 25. Matud pa ni Mayor Lawrence Cruz, dako kini nga tabang alang sa pagtubag niadtong nawad-an ug panimalay atol sa baha dala ni Sendong. (CIO/PIA-10) | 
