PIA Press Release
Friday, January 20, 2012

Hiligaynon News: PhilHealth coverage magapadayon para sa pinaka imol nga mga pamilya sa Capiz

Ginpahayag ni Mary Jane Amigo nga amo ang Public Information Officer sang PhilHealth – Capiz Service Office nga ang nahinambitan nga mga benepisyaryo sang PhilHealth Insurance amo ang imol nga mga pamilya nga nakasulod sa ukon National Household Targeting System for Poverty Reduction (NHTS-PR) nga isa sa prioridad nga programa sang Administrasyon ni Presidente Beningo S. Aquino III.

Ang duha ka tuig nga libre nga health insurance coverage ang natigayun matapos nga ginaprobahan ang General Appropriations Act para sa tuig 2012 kon sa diin nagpain sang nagakaigo nga pondo para sa national government subsidy agud ibayad sa Philhealth premiums sang pigado nga mga pamilya nga nasulod sa NHTS-PR.

Tinutuyo sang programa nga mabuligan ang imol nga mga pamilya sa tion nga maospital subongman maprotektahan kag mapaumwad ang ikaayong lawas sang mga imol nga amo ang masami nga nagabalatian.

Samtang ginapaabot sang PhilHealth sa mga indigent members nga gina sponsoran sang nasyonal nga gobyerno ilabi na yadtong nagauyat sang ID Number nga nagasugod sa 23 kag may expired na nga validity apang naospital subong nga tuig nga mag-pakig-angut sa talatapan sang PhilHealth agud mahatagan sang sertipikasyon nga mahimo gamiton sa ospitalisasyon.

Nahibaluan nga ang ang probinsya ang may 122,831 ka mga imol nga pamilya nga gina bayaran sang naglainlain nga mga sponsor agud mahatagan sang libre nga PhilHealth insurance coverage.

Ginalakipan ini sang 36,618 ka pamilya nga gina-sponsoran sang gobyerno nasyunal, 36,565 nga gina sponsoran sang gobyerno probinsyal, 49,132 nga ginabayaran naman sang nagkalainlain nga munisipyo kag congressman kag 516 nga pamilya nga ginabayaran direkta sang tatlo ka mga barangay nga may separado nga Memorandum of Agreement sa PhilHealth. (JCM/AAL/PIA 6 Capiz)