PIA Press Release
Saturday, January 21, 2012 Cebuano news: House Speaker mihatag og usa ka milyon pesos nga ayuda alang sa water supply improvement sa ICWSILIGAN CITY, Lanao del Norte, Jan. 21 (PIA) -– Miggahin si House Speaker Feliciano “Sonny” Belmonte og usa ka milyon pesos nga ayuda alang sa gipaningkamutan karon sa Iligan City Waterworks System kon ICWS nga pag-usbaw sa pundo sa tubig human mahitabo ang baha sa ning dapita.Nasayran kini pinaagi sa tawag ni Iligan City Representative Vicente “Varf” Belmonte, Jr. ngadto kang City Councilor Moises Dalisay, Jr. bag-ohay. Mibutyag si Dalisay nga bitbit na ni Congressman Varf Belmonte ang maong tabang sa iyang paghidangat og balik dinhi sa Iligan. Miasoy usab ang Chairman sa Committee on Water sa konseho nga aduna na sila’y talaan sa paggamitan sa maong salapi. Kini mao ang pag-ayo sa linya sa tubig gikan sa sentrong bahin sa San Roque ngadto sa Sitio Lambaguhon, pag-ayo sa ‘by-pass line’ sa Noria paingon sa city hospital ug pagpalit og dugang ‘chlorine tablets’ alang sa pagsiguro sa kalimpyo sa tubig nga gihatud sa mga trak sa tubig ngadto sa kabaranggayan. (CIO/PIA-10) |
