PIA Press Release
Saturday, January 21, 2012 Cebuano news: Laing ‘city-wide clean-up drive’ ipahigayon sa Enero 25ni Boy DecenaILIGAN CITY, Lanao del Norte, Jan. 21 (PIA) -– Laing hugna sa ‘clean-up drive’ sa tibuok dakbayan ang ipahigayon dinhi sa Iligan karong umaabot nga Enero 25 sa buntag isip subli sa nauna nang pagpanglimpyo niadtong Enero 7. Mao kini ang nauyonan atol sa pagpakigtagbo ni Mayor Lawrence Lluch Cruz tali sa mga opisyales sa Association of Barangay Councils (ABC) didto sa Cabigon Hall sa city hall bag-ohay. Sa maong panagtigum, subling nag-awhag ang pamuno-dakbayan ngadto sa mga kadagkoan sa barangay nga molambigit sa pagpanghinlo og balik sa siyudad human kini mahi-agum sa baha gumikan sa paghapak ni bagyong Sendong niadtong miaging bulan. Kabahin usab ang maong kalihukan sa pagpangandam sa paghidangat sa mga kadagkoan gikan sa nasudnong kagamhanan sa susamang adlaw. Alayon niini, mohatag si Mayor Cruz og tag dose mil pesos matag barangay aron ipalit og mga kagamitan sa pagpanghinlo, pagkaon ug uban pa. Kini pagakuhaon sa ‘discretionary fund’ sa ‘local chief executive.’ Mimando usab si Mayor Cruz sa ABC nga motambong sa shelter build program didto sa Sta. Elena relocation site ug sa Santos nga Misa pagka hapon sa Enero 25 didto sa Mandulog Bridge agi’g paghandum sa ika-40 ka adlaw sa mga namatay sa baha. (CIO/PIA-10) | 
