PIA Press Release
Tuesday, January 24, 2012 Masbateño news: Kuryente binalik na san NAPOCOR sa Ticao Island sa MasbateSIYUDAD SAN MASBATE, Enero 24 (PIA) -- Sa gihapon napuslan san sobra 6,000 na kabalayan sa Ticao Island an katawhayan dara san elektrisidad matapos na ibalik san National Power Corporation (NAPOCOR) an suplay san kuryente na inutod dahilan san utang san power distributor.Gin areglo ni Masbate Congressman Narciso Bravo, Jr. an problema sa kuryente san iya paaratubangon an mga opisyal san NAPOCOR kag Ticao Island Electric Cooperative o Tiselco sa isad na dayalogo san nakaligad na Sabado. Binalik san NAPOCOR an ilaw banda alas dose mismo san Sabado pakatapos na mag-iristoryahan kun diin gin tagaan an Tiselco san dugang na tiempo para mabayadan sani an power bill na umabot na sa P95 milyones. Sa sumada ni Bravo, na cierto sa dayalogo an upat na dapat himuon san Tiselco para maipadayon sani an distribusyon san kuryente sa Ticao. Una, ibanan an kuryente na ginakawat kag nasasayang dahilan san napakhataas san systems loss san Tiselco, Ikaduha, islan an pamunuan sa Tiselco, Ikatulo, kabitan san kuryente an mga lugar na padayon na nagpangapkap sa dulom kag para madungan an 6,000 member-consumers san Tiselco, kag itaas an power rate na P10 kada kilowatt. Gin hangyo man ni Bravo an aktibo na partisipasyon san member-consumers sa paghanap kag paghatag san solusyon sa problema san Ticao. An Ticao na gina komponer san upat na munisipyo isad san tulo na daragko na isla san probinsiya san Masbate. (MAL/RAL/PIA-5) | 
