PIA Press Release
Wednesday, January 25, 2012

Waray News: MGB-8 nagrerekomendar pasuspende tanan nga small scale mining permits ha E Samar

Hi MGB-8 Director Roger de Dios in nagsering nga naghimo hiya hin rekomendasyon pinaagi hin surat nga ginpadara dida han Disyembre 2011, nga naka-address ngadto kan MGB Director, Engr. Leo L. Jasareno, kun diin may kopya gihapon ngadto han DENR Secretary.

Sering ni Director de Dios nga pinaagi han pagsuspendi han small scale mining permits nga iginpapagawas ha Sinirangan Samar, malilikayan an pagsarang han iligal nga mga small scale mining nga mga aktibidad dida han probinsya.

Iginrekomendar gihapon han MGB Director nga maghimo hin usa nga composite team nga makomponi han MGB-8, Environmental Management Bureau-8, Provincial Environment and Natural Resources Office Eastern Samar, ngan han Provincial Government han Sinirangan Samar, para utro nga ig-evaluate o ig-validate an ngatanan nga small scale mining permits para hin posibli nga pagbawi han suspension, depende han pagsunod han mga ginkikinahanglan nga igsumite sugad han work programs ngan rehabilitation plans, pag-establisar han Mine Rehabilitation Fund para ha kada usa nga nangangaro han permit ngan pag-organisar han Municipal Monitoring Team para hin hul-os nga pagbantay han gindudumara nga operasyon han pagmina.

An rekomendasyon in namugso matapos an hag-id nga monitoring ngan field investigation nga gindumara han mga MGB technical personnel dida han Nobyembre 28-29, mahitungod hin damo nga mga reklamo tungod han sige-sige na nga mga aktibidad hin pagmina dida ha probinsya han Sinirangan Samar.

An field investigations in gindumara ha mga bungto han Salcedo, Guiuan, General MacArthur, Llorente ngan Hernani, nga puro ada ha probinsya han Sinirangan Samar.

Naobserbahan han nag-imbistigar nga grupo nga an mga nakapot han SSMP in namamalit han ore concentrates tikang ha mga ilegal nga mga contractor.

Mahinunumduman nga dida han Congressional-LMP Interagency Consultations nga pinangunahan han Hon. Congressman han nag-uusahan nga distrito han Sinirangan Samar nga hi Ben Evardone dida han Nobyembre 18, 2011, ha siyudad han Borongan, an ilegal nga small-scale chromite mining operations nga nahisumat nga nagresulta hin dako nga danyos ha kalibungan dida han ira tagsa-tagsa nga mga lugar, an pinakarason nga ginpadangat han mga narepresentar han LGU. Tugot hira nga tanan han pagpa-undang han gindudumara nga ilegal nga mga aktibidad parti ha pagmina ha ira tagsa-tagsa nga mga lugar. (Translated by MAA/PIA-8)