PIA Press Release
Thursday, January 26, 2012 Cebuano News: “Bayanihan Ng Bayan: Anong Taya Mo Para Sa Bayan?” gilusad sa Iliganby Divina M. SusonILIGAN CITY, Lanao del Norte, Jan. 26 (PIA) -- Gilusad kagahapong adlawa dinhi sa dakbayan sa Iligan ang “Bayanihan Ng Bayan: Anong Taya Mo Para Sa Bayan?,” alayon sa pagsaulog sa ika-40 ka adlaw nga pag-obserba sa nahitabong kalamidad dinhi sa dakbayan tungod sa bagyong Sendong. Ang “Bayanihan Ng Bayan: Anong Taya Mo Para Sa Bayan?” usa ka kampanya alang sa usa ka malungtaron nga paningkamot alang sa pagbarog og pagbalik sa katilingban ug sa mga kinabuhi nga naapektuhan sa nasangpit nga kalamidad. Gipangunahan ang maong kampanya sa Presidential Communications Operations Office-Office for Special Concerns sa buhatan ni Presidente Benigno Simeon Aquino III. Kauban niini ang mga nasudnong buhatan sama sa Department of Public Works and Highways (DPWH), Department of Social Welfare and Development (DSWD), National Youth Commission (NYC), EDSA People Power Commission (EPPC), ug mga non-government organization (NGO) sama sa Gawad Kalinga (GK). Mamahimong pipila sa mga dagkung kalihukan ang pagpanglimpyo o clean-up drive; Iliganon Heroes Build sa resettlement site sa Sta. Elena; Paraisong Pambata: Iligan’s Biggest Kids Paty sa Mindanao State University-Iligan Institute of Technology (MSU-IIT) Gym; Ground Zero Ceremony sa naguba nga Mandulog Bridge sa Hinaplanon; Solidarity Walk; ug Bayanihan Ng Bayan Concert sa MSU-IIT Gym. Ang clean-up drive pangunahan sa mga opisyal sa barangay ug sa Sangguniang Kabataan (SK) Federation. Gilauman nga mosalmot usab niini nga kalihukan ang mga residente sa mga barangay o komunidad nga naapektuhan sa bagyong Sendong. Sa Iliganon Heroes Build o shelter build, gilauman ang 300 ka mga team o grupo nga gikan sa nagkalain-laing kolehiyo, universidad, organisasyon, local government units ug uban pang grupo nga gikan sa ubang nasud sa kalibutan. Ang matag team langkuban sa kinse ka mga membro nga adunay panday ug mason nga mohimo sa usa ka balay matag grupo. Ang kids party usa ka paglingaw sa kapin kun kulang dos mil ka mga bata nga naapektuhan sa bagyong Sendong nga pangunahan sa mga estudyante sa St. Michael’s College ug sa mga GK Youth ug mga volunteers. Adunay andamon nga dakong ‘cake’ ang tinun-an sa Hotel and Restaurant Management (HRM) sa SMC alang sa mga bata nga mohatag sa ilang mga pag-ampo ug mga panghina-ut. Ang Ground Zero Ceremony usa ka misa-pag ampo alang sa mga biktima sa pagbaha samtang ang solidarity walk ipahigayon human sa maong misa diin ang mga volunteer nga misalmot sa nasangpit nga misa maglakaw dala ang sulo paingon ngadto sa MSU-IIT Gym. Usa ka konsiyerto nga gitawag og Bayanihan Ng Bayan Concert ang masaksihan sa publiko paghidangat sa MSU-IIT Gym. (CIO/PIA-10) | 
